Trahando seis aña caba como makiyador profesional den e mundo di beyesa, George su trabou ta encera hopi contacto fisico cu su clientenan. E impacto cu e crisis di coronavirus a haci ta, cu e mester a cancela mayoria di su trabounan, y esaki obviamente financieramente ta afecta tanto George como su famia, pero su salud y di su famia ta na prome lugar.
Con bo a sinti y ki bo a pensa ora a anuncia e prome caso di COVID-19 na Aruba?
E unico palabra cu mi por uza pa e pregunta aki ta: “miedo”! E miedo di perde sernan stima, miedo di e crisis economico cu esaki lo hiba nos isla den dje, unda hopi famia lo keda sin trabou y sin cuminda.
Bo opinion di e situacion na Aruba actualmente
E situacion na Aruba por wordo mehora si nos tur mantene nos mes na e reglanan stipula. Si nos para keto un rato y laga nos ignorancia un banda nos por sali di e crisis aki hopi mas liher di loke nos mes ta kere.
Con bo ta mantene bo mes positivo durante e crisis aki?
Mi ta mantene mi mes positivo den e crisis aki di lanta mainta y yama danki pa un dia mas, danki pa un dia nobo, danki pa tin salud y alegria, danki pa tin cuminda y energia pa por sigui perservera.
