Semper David a biba na Francia, prome cu el a yega Aruba, dia 6 di november 1990.  E prome cos cu a atrae di e isla tabata, e amabilidad di e hendenan y cu aki e bida ta mas trankil. David a crece memey di chef den cushina den e restaurantnan di su tata na Francia y awendia ta forma parti importante di Casatua y Bohemian, cu ta dos restuarant cu ta brinda un experiencia unico na Aruba, tanto na e local- como e turistanan. E dos restaurantnan aki tabata entre e promenan, cu a dicidi di cera pa e situacion di e coronavirus.

E tempo cu David a muda pa Aruba, e hendenan no tabata sa cu su tata, Victor Nataf, ken tabata e propietario di e tiendanan Benetton, tabata antes den e negoshi di restaurant y cu ademas e tabata un dentista. David a bin Aruba pa traha cu su tata den e negoshi y biba riba un isla tropical, lagando atras su bida den zomer na Sur di Francia y den Winter den Alpen. El a crece conociendo loke ta e delicia di e cushina Mediteraneo y ta corda cu hopi nostalgia e temporada cu el a pasa como mucha na Francia.

Bohemian ta un restaurant cu a ser crea, completamente for di un espacio patras den un parking lot

Con e idea di Bohemian a nace?

Canando hunto cu mi ruman, Gregory, nos a wak e lugar cu for di e caya principal, bo no ta wak e for di dilanti. Nos a cana den e parking lot bay patras y mi a bisa esaki ta un pida tereno grandi, cu no ta uza. Nos a pasa henter un siman sinta tur anochi memey di e palo- di mata y takinan bieu, pa por sinti e biento y zonido, pa despues dicidi di bay papia cu e corporacion. 

Ki rol bo tin den e maneho di Casatua?

Mi lo bisa cu Victor y Gregory tin e ‘backup’ di Casatua. Gregory ta realmente e “pizza guy”, cu ta traha e mansa pa e pizza tur dia pa 19 aña largo. Gregory ta e pilar di Casatua, pa loke ta trata e pizza, mientras cu Victor ta e “mastermind”, y ami ta mas tanto den e decoracion y duna e “feeling” na e lugar. Mi  a rediseña Casatua na Palmbeach y esun situa na Renaissance Marketplace mi a diseña completamente.

Con e relacion comercial ta cu Victor?

Pa nos e ta “patriarch” di e famia.  Unda sea cu e famia Nataf  ta estableci, cu nan ta biba na Francia, Sint Maarten  of otro lugar, Victor ta e persona cu tur ta wak como e lider di e famia. 

Cua ta e miho les di bida cu e la duna bo?

 Traha – Traha- Traha!

Con bo ta sinti pa sigui su pasonan den negoshi?

Mi ta sigui su consehonan y no su pasonan.

Ki ta bo responsabilidadnan como doño di negoshi?

Pa percura pa bo staf ta feliz! 

Ki bo ta busca den un empleado?

E SMILE!

Na ki bo ta atribui e exito di e restaurantnan?

Cu como doño bo t’ey presente den e restaurant y scucha bo huespednan.

Si bo mester duna un conseho na un persona cu ta djis cuminsando cu su negoshi, ki esaki lo ta?

Nunca  “give up”, pasobra tin biaha bo por ekiboca. Uza bo sentido comun y si bo faya ta pa gana un experiencia.

Ki Aruba ta nifica pa e famia Nataf?

Aki ta unda nos ta biba y ta nos cas.

Mientras cu Bohemian y CasaTua ta cera, David ta entretene su mes na cas cu su hobby como DJ y prepara diferente plato

LEAVE A REPLY

Please enter your comment!
Please enter your name here