KEN LO BIRA MISS ARUBA ONLINE 2020?

Dia 9 di April a inicia cu e prome Challenge di Miss Aruba Online, unda e 11 concursantenan a introduci nan mes  ‘This is Me’, cu a sigui despues cu 7 Challenges mas, pa finalisa cu entrevista cu hurado y votacion via IG. Awe nochi lo anuncia den un programa innovativo cu ta cuminsa 9:00PM e ganadornan.  Manera cu e director y fundador di MAO, Endy Croes, a elabora den un entrevista cu FOCUS Online, cu e certamen aki no ta manera e certamennan tradicional. Nan reglanan a permiti mas candidata inscribi door di kita tur e presionnan tradicional cu un reina di beyesa tin ora di competi den un certamen di beyesa. E criteria manera figura no ta importante, estatura no ta importante, estado civil no ta importante y tin igualidad di genero.

E cinco huradonan a husga puramente e esfuerso inverti di cada participante den cada Challenge. E atencion riba estetica tradicional no tabata e factor mas relevante pa scoge e ganador.Tur candidata mester a percura pa nan haci cada Challenge di e mihor forma posibel, pa por a resalta den e grupo grandi di candidata. Aki contenido tabata sumamente esencial y e huradonan a sa di haci nan votacion na e manera husto pa e escogencia den cada Challenge.

E certamen tabata basicamente riba INSTAGRAM so, pues na ningun momento niun candidata a topa otro di forma personal ni tampoco e miembronan di hurado. For di e combersacion despues di e ultimo rond di entrevista online via ZOOM, e huradonan a expresa cu hopi satisfaccion nan bunita experiencia. Alabes nan a gradici Endy Croes y e organisacion pa pone e confiansa den nan como hurado pa scoge Miss Aruba Online 2020. Pa nos di FOCUS Online tabata un honor grandi di tabata parti di e team di hurado.