Rey Willem -Alexander ta cumpli 53 aña y a celebra su cumpleaño hunto cu su casa Reina Máxima y yiu muhenan; Amalia, Alexia y Ariane. Manera ta custumber tur aña e famia Real Hulandes ta celebra Dia di Rey den diferente parti di Hulanda y pa 2020 tabata turno di Maastricht.
E festividadnan na Hulanda y den Reino Hulandes a wordo cancela pa causa di e coronavirus COVID-19, na unda ta prohibi aglomeracion di e residentenan y ta pidi pa cumpli cu e medida di keda cas pa asina no sigui plama e virus.
For di su palacio Huis Ten Bosch Rey Willem-Alexander a duna su mensahe riba dia di su cumpleaño den compania di su famia. Pa keda den comunicacion cu e pais riba e dia aki, durante di e dia e famia Real Hulandes, via di e plataforma digital, a participa na diferente actividad importante online. Pa 4.00 di atardi (10:00AM ora di Aruba) a sigui un toast nacional pa cera e dia di Rey.
APRECIO PA REY WILLEM-ALEXANDER
Durante e tempo di crisis mundial aki, hopi hulandes ta aprecia e accion di Rey Willem-Alexander. Esaki ta e resultado di un encuesta realisa pa Ipsos bou encargo di NOS. Rey Willem- Alexander ta ricibi segun e encuesta 7.7 y ta e cifra mas halto cu el a ricibi, for di e momento cu el a bira Rey. Di e hulandesnan, ocho di cada dies ta satisfecho cu e forma con Rey Willem-Alexander ta profila den e ultimo añanan. Mas di tres kwart a afirma cu nan tin confiansa den Willem-Alexander como Rey. E ta wordo caracterisa como humano, comprometi y compasivo. Menos su aprecio ta den entre otro: salario, su actitud poco rigido y su titulo hereda. Toch seis di cada dies Hulandes ta kere cu e tradicion di trono di sucesion tin cu continua.
Credit RVD
