E news anchor di 52 aña a revela e feliz noticia cu el a bira tata riba su Instagram hunto cu e potretnan di su yiu homber, Wyatt Morgan Cooper. E periodista a welcome Wyatt dialuna, cu a bin na e munda aki via un ‘draagmoeder’, y el a revela tambe e gran noticia den su programa Anderson Cooper 360.
E tata yen di orguyo a bisa cu Wyatt a pisa 7.2 liber y cu e ta sweet, soft y saludabel den un anuncio emotivo na CNN. E baby tin e nomber di su tata cu a muri tempo cu Cooper tabatin 10 aña y e ta spera di por ser mesun bon tata. E di dos nomber Morgan ta di parti famia di su mama, y e sa cu ambos tabata gusta e nomber pasobra recientemente el a haya un lista cu nan a traha hunto 52 aña pasa tempo cu nan tabata pensa un nomber p’e.
Anderson Cooper a pensa cu nunca paternidad lo ta un posibilidad p’e mientras e tabata creciendo. Como un ‘gay kid’, el a pensa cu no tabata posibel pa tin un yiu, y e ta gradicido na tur esunnan cu a habri e caminda, y e dokter- y enfermeranan y tur esunnan involucra den e nacimento de su yiu, el a skirbi riba su Instagram.
Sin embargo e ta hopi agradecido na e ‘draagmoeder’ cu a carga Wyatt, y cu a cuide cu amor y ternura. E ta un bendicion extraordinario loke e y tur e ‘draagmoeders’ ta duna na e famianan cu no por tin yiu, Anderson a bisa. E mes tin un bunita famia, un esposo y yiunan maraviyoso, y e ta increiblemente agradeci pa tur e apoyo cu nan a duna Wyatt y tambe na dje. Su famia tin e bendicion di tin e famia aki den nan bida.
