Durante e temporada cu Angela tabata na keda cas, el a dedica pa construi su atelier artistico, unda tur e detayenan di su emocionnan y su estado spiritual e por a plasma eyden. E ta un logro hopi grandi di por a realisa e atelier aki. Un lugar unda e ta exponiendo su obranan y lo pone obra di otro artistanan tambe, unda por bin bishita e lugar manera un atelier. Ya awor Angela por sinta den su atelier y bisa: “WAW esaki ta fruto di mi man- y emocionnan, y mi contacto cu bida y di biba cada dia, artisticamente loke mi a logra atrabes di e atelier aki”. E tabatin tempo suficiente y ta emocionalmente prepara pa logra realisa e proyecto aki. E tabata na cas y no tabatin nada otro cos pa haci. Mientras cu e no por a canta y haci su shownan, el a dedica na haci e proyecto di un atelier, cu tabata algo fantastico y ta un logro emocional y artistico.
Angela antes tabata encarga pa haci e proyecto cu yama Un Musa, cu a bin despues di Access Art Gallery. E tabatin e oportunidad di haci un cas di arte caminda e hendenan por a bin contempla tur tipo di obra. E diferencia cu e atelier cu Angela a caba di haci ta, cu esaki ta na su cas crea completamente te ultimo detaye p’e mes. Como diseñadora di interior semper el a realisa proyecto pa otro hende, pero den e caso aki loke el a haci ta p’e mes. E bishitantenan por pasa y disfruta di su cas y mira loke el a logra despues di tanto aña bibando na Aruba. E tabata un deseo y vision pa tin su propio obranan, y pa su amigonan artista plastico tambe por bin expone nan obranan. Angela ta bay comparti tambe e specialidadnan cu semper e ta cushina di e gastronomia spaño na su cas.
PANDEMIA NA SPAÑA
E tabata un shock hopi grandi pa Angela mirando con e Pandemia COVID-19 tabata na nivel di hendenan contagia y mortonan na Spaña, unda hopi hende trahando na e hospitalnan tambe a wordo contagia. Un pais manera Spaña tabata sumergi den un crisis teribel. E tin su dos rumannan y famia cu ta bibando eynan, ya cu su mayornan no t’ey mas. Su rumannan cu ta biba na Barcelona y Valencia mester a keda cera den cas y ora nan sali pa cumpra cuminda, e soldadnan ta para riba caya ta controla. E ta haya cu na Aruba nos tabata bon compara cu na Spaña cu e situacion tabata teribel. E ta pensa cu tur cos ta pasa pa un motibo aunke ta dificil pa expresa of papia, nada ta pasa pa casualidad. Papiando den un plano mas spiritual tur cos tin su proposito y motibo. E sa cu Dios tin control di tur cos. Nos mester pensa ki ta nos posicion y actitud, cu e crisis aki cu ta mundialmente. Esaki ta pasando pa algo!
E bida normal despues di pandemia, e ta kere nunca ta igual den e sentido cu nos sicologicamente of emocionalmente ta bay mira e cosnan di otro manera. Ya nos ta apreciando e cosnan cu antes no tabata haci, manera e importancia di conta cu nos amigo- of sernan keri. Cu bo por a sali bay sinta un caminda cu antes nos no tabata balora, pero awor nos lo bay hacie. E echo di por duna un persona un brasa lo tin un significacion mucho grandi cu antes. E ta pensa cu e resultado di tur esaki ta cu nos cada un den nos mente no lo bay ta mescos, pasobra mas hende ta bay realisa y aprecia mucho mas tur cos. Como cantante Angela tin hopi necesidad pa bolbe canta y haci su presentacionnan pa demostra su alma y curason. E ta kere di ta un persona cu semper a mustra su curason mientras e ta canta, pero ta kere cu awor e lo bay aprecia esaki mucho mas cu antes. Simplemente pa e echo cu awor e no por tin contacto cu e publico manera algun luna pasa, ta marca un diferencia grandi di loke ta significa pa bolbe canta como artista y cantante profesional. E distanciamento social ta pone cu den e siguiente presentancionnan ya e no por tin e contacto personal, pero tur cos ta un cuestion di custumbra.
