Pa celebra e prome cumpleaño di Archie Harrison, Meghan Markle y Prins Harry a comparti potret y video di nan yiu riba su dia special. Meghan ta lesa un di e bukinan faborito di Archie, Duck! Rabbit!, cu un bunita potret, cu ta un ‘still image’ di e video, cu a wordo saca pa prins Harry den nan cas nobo na Los Angeles. Desde un aña pasa e bida di Meghan y Harry a cuminsa cambia cu e yegada di nan primogenito, Archie Harrison. Ademas cu algun luna despues nan a anuncia nan intencion di separa di e famia real britanico, cu a conclui recientemente.
Den e video di casi 3 minuut graba pa prins Harry por mira Archie ta haci e gestonan tipico di un mucha di su edad mientras e ta mustra algun dibuho cu mas ta yama su atencion. E dukenan ta sostene e campana @SaveWithStories na Merca – y @SaveChildrenUK na Reino Uni, cu ta yuda e muchanan cu a wordo afecta negativamente pa e pandemia COVID-19. E famia real di nan parti tambe a post riba nan social platform nan felicitacion pa Archie Harrison cu su prome cumpleaño awe 6 di mei.
