YELITZA DOMACASSÉ HELMEYER

Den edicion di revista FOCUS di mei 2019, a ilustra un enteresante entrevista cu Yelitza Domacassé Helmeyer, unda el a conta di su embaraso y nacemento di su morocho cu e ta describi como un ‘milager’ . Yelitza a haya sa hopi liher cu e ta na estado, apenas e cu su casa Herbert Domacassé a bin bek di un vakantie, el a cuminsa sinti malo. Na prome instante el a kere ta un virus of kisas e cambio di cuminda. Sinembargo un mainta trempan, sinta na mesa, e tabata sinti marea y a lanta pa bay traha, pero el a casi cay. E señora cu ta yuda nan na cas a bis’e cu Yelitza a lag’e corda tempo cu e mes tabata na estado. Yelitza tabatin un embaraso cu el a categorisa como horibel, pero e resultado ta e cos di mas bunita cu e por a experiencia y ta bal cada dolor. Tanto Yelitza como Herbert ta gradici y ta describi nan morocho como un milager y soño cu nan no a spera di por a bira realidad, pero ora cu Dios ta den control, tur cos ta posibel.

Mas cu claro, Yelitza y Herbert kier a haci e anuncio di embaraso uno memorabel y unico. Na momento cu Yelitza a pasa su 3 luna, tabata net su cumpleaño y hunto cu nan tremendo amigonan Endy y Carl, cu ta nan ‘party planners’, nan a cuminsa kibra cabes pa haci algo peculiar. Nan a invita tur nan famia- y conocirnan mas cerca y a laga traha un piñata y pone e cosnan di baby y tambe un potret cu nan ta sperando morocho! Despues di canta happy birthday cu bolo, nan a laga tur hende grandi cu nan saco pa piki e cosnan di piñata. E gritonan di alegria ta algo cu Yelitza y Herbert nunca lo lubida. Tur hende tabata contento y mas ainda ora nan a ripara cu no ta 1 sino 2 baby ta na caminda.

Kico bo dokter a conseha bo mirando cu bo ta un mama cu ta cay den “edad mas di riesgo di maternidad?

Prome cos cu mi dokter di cas y ginecologo a conseha mi ta, pa mi “slow down”, mirando cu nan sa cu mi ta un ‘workaholic’ y perfeccionista. Nan tabata sa, cu mi lo mester cuida, paso e risiconan ta hopi mas grandi y mas ainda, cu mi tabata sperando 2 baby.

Bo a haci test pa wak si tur cos ta bon cu e baby?

Si, mi a haci NIPT test pa wak si tur cos ta ok cu e babynan.

Con bo a experiencia bo embaraso?

Mi embaraso tabata algo cu lastimamente, mi ta categorisa como horibel. No tabatin 1 dia cu mi no tabatin dolor. Mi tabata sinti mi riba un barco riba e olanan bruto tur dia. Mareo, dolor di cabes, dolor di stoma, dolor di lomba, sin gana di nada, fatiga, hopi soño, hopi cansancio y cu hopi antoho na bolo y ijs! A interna mi den hospital varios biaha durante mi embaraso.

E momento cu dokter a dicidi cu bo tin cu bay cu air ambulance Colombia, con bo a sinti?

Mirando cu mi a pasa malo desde inicio, el a adverti mi basta biaha, cu lo tin posibilidad cu si sigui asina, mi lo tin cu bay Colombia. Pero mi no a spera cu e dia ey lo yega.

Kico bo por corda di e dia di e noticia ey?

Mi ta corda mi tabata tin 3 dia cu dolor insoportabel, cu no ta laga mi drumi, pero mirando cu tabata cos di tur dia, mi no a pensa cu lo ta algo mas grave. Mi a bay traha y durante dia mi a sinti e dolornan tabata birando mas fuerte. Den mi lunchbreak mi a bisa Herbert, cu mi lo ta desea di check toch si tur cos ta bon. Ora nan a test tur cos na hospital a bin resulta cu, ya mi tabatin contraccion y cu tabata peligroso, paso mi tabatin e momento ey 25 siman so y na Aruba nan no por haci nada pa mi babynan, si nan nace asina prematuro.

“Tabata momento hopi dificil y di angustia, pero mi a pensa cu mi yiunan e momentonan ey ta na prome luga y cu si mester bay Colombia pa tur cos sigui cana bon, lo tin cu haci esaki sin pensa 2 biaha.”

Cuanto tempo bo a keda interna na e hospital y con e proceso a bay, te ora cu bo tabata for di peliger pa bula bin Aruba?

Mi a keda interna 1 siman na hospital y tur dia nan tabata monitoria e babynan y ami mes, mirando cu mi mes tabata hopi zwak. En bes di subi peso, mi tabata baha mas y mas cada siman. Despues cu tur cos a stabilisa y nan por a controla tur dolor, dokter a dicidi di manda mi ‘cas’, pero cu mester ta na Colombia mes, cu e condicion cu cualkier cos, mi lo mester bay emergencia y cu 2 biaha pa siman, mi mester bay controla na su oficina. Reposo absoluto na cama, cu si acaso mi kier a sali for di camber, lo mi mester a haci esaki den rolstoel, paso mi no por a cana sin dolor y e risico tambe cu mi barica tabata hopi grandi y pisa.

Dicon bo no a keda pa duna luz na Colombia?

Dokter na Aruba a bisa mi e risico tabata te cu 32 siman, paso si nan nace prome cu esey, Aruba no por a yuda mi. Dokter na Colombia a bisa mi, cu manera mi tabata recuperando despues di 32 siman, mi por bay bek trankilmente y haya nan na Aruba mes. E tabata un decision dificil, paso toch e momento ey, bo no sa si bo bin bek y cualkier cos cu pasa, tin risico pa bay bek. Despues cu a haya siguransa completo di e dokter na Colombia, nos a dicidi di toch bin haya e babynan na Aruba, ya cu e risiconan grandi ta tras di lomba. Cu 33 siman mi a bula bin bek Aruba cu resposo estricto na cama of den rolstoel, te ora cu nan nace.

Con e proceso di control a sigui na Aruba te momento cu mester a haci un cesarea?

Manera cu nos a yega Aruba bek, a atende nos tur siman pa control cerca ginecologo y a dicidi di scoge un dia pa cesarea; 16 di februari. No mas cu e morochonan aki, cu desde promer dia cu nan a bolter mi bida, nan a dicidi di bin 3 dia prome y a nace 13 di februari, ora mi tabatin 37 siman.

Ki tabata e sentimento, ora bo a wak bo morocho pa prome biaha?

Joah a nace prome, pero toch nan a pone Jeyah promer riba mi pecho. E promer cos cu mi a sinti ta un alivio grandisimo y keda asombra con perfecto un baby ta nace. Un emocion di ‘love at first sight’ y locual cu mi a expresa tabata cu mi no por a ‘get over’ e echo cu Jeyah tabata pinto su tata. E tabata algo increibel, pa admira con hopi Jeyah a nace ta parce Herbert.

Ora bo wak bo morocho, kico tur bo ta pensa?

Cu despues di tur loke m’a pasa, e tabata bale la pena tur dolor, tur malestar, Colombia tur cos a keda den pasado y cu porfin mi tin mi ‘miracle twins’ den mi brasanan y ta e cos di mas bunita cu mi por a experencia.

Con e prome simannan tabata na cas cu cuido di Jeyah y Joah?

E prome siman nan tabata poco duro, mirando cu nan mester a bebe cada 3 ora sin por skip, door cu nan tabata poco bou di peso. Pero esaki a dura precies 6 siman y despues por a skip den anochi, cual esun di 3or di marduga tabata esun di mas fastioso. Unabes cu nos a yega 3 luna, nan tabata drumi 7 ora sigui y te dia di awe nan ta drumi ful anochi. Nos tabatin mester di hopi man pa yuda, mi mama, mi suegra a bin yuda, Silvia un enfermera specialisa den recien naci y tambe e nana, cu ta haci un tremendo trabou pa yuda nos cu Jeyah y Joah.

Bo a duna lechi di pecho?

No, mi no a duna lechi di pecho. Lamentablemente mi no a produci net net nada di lechi.

Ki ta importante den alimentacion di bo yiunan pa nan crece sano?

Nos ta balansa e cuminda mas cu ta posibel y evita sucu. Nos ta hopi estricto na ki fase e muchanan ta y kico nan tin mag di come of bebe. E prome 6 luna tabata lechi so, despues a cuminsa cada fase cu nan mag come of bebe algo, por ehempel papa of fruta etc. Esaki ta evita cu despues lo por tin problema cu e salud of crecemento. Tur cos tin nan momento y nos no ta duna nan e cosnan, djis pa mas facil.

Kico ta e reto mas grandi cu bo ta encontra awo den termino di balansa tempo?

Nan ta y ami ta un hende semper na ora (e malo, of juist bon di a biba hopi aña na Hulanda) kiermen mi no ta usa e excusa, cu door cu mi tin morocho, p’esey mi ta yega laat un caminda of ora mi tin un cita. Kiermen si mester yega tal ora, mester cuminsa mas trempan pa preprara tur cos. Ta un simpel ahuste y organisa tur cos netjes, pa tur cos cana manera mester ta.

Menciona 1 cos cu bo ta haya falta di dje prome cu bo a haya Jeyah y Joah?

Spontanidad! Ami semper ta hopi spontaan den hopi cos. Despues di trabou mi ta bisa mi casa ban haci tal cos of ban tal caminda y nos ta haci. Of mi ta reserva un un trip spontaan, pa nos ta ‘eventjes eruit’. Ta e cosnan cu lo por pasa, pero no spontaan mas. Mester prepara y organisa tur cos basta mas adelanta y regla babysitter.

Con ta disfruta di un dia liber?

Nos dia preferi ta dia cu nos ta hunto como famia y ta purba na varia mas cu ta posibel. Bishita mi mama of bay na mi wela, bay lama of cana cu e muchanan, of simplemente ta na cas y disfruta cu e muchanan y tur nos cachonan hunto. ‘Chaos is our normal’ y nos lo no cambia esaki pa nada.

Kico ta 1 cos cu lo bo haci diferente como mama compara cu bo mama?

Tremendo pregunta, contesta dificil, paso mi ta poco ‘oldfashion’ y ta haci hopi cos, manera mi mama a lanta mi. Nos ta purba di combina ‘old fashion’ cu tempo moderno y wak con esaki ta funciona.

Cua di e morochonan tin e caracteristicanan di Yelitza y di Herbert?

Joah su fisico ta manera ami tempo mi tabata baby, pero su caracter manera su tata, super sweet, gusta knuffel y haci lief y ta hopi ‘caring’ cu su ruman. Jeyah su fisico ta manera Herbert, pero caracter manera ami, super ‘strong will/minded’, no ta tuma no pa contesta asina facil, no ta gusta knuffel y ta hopi independiente.

“Locual cu tur 2 tin manera nos tur 2 ta, cu niun di 2 tin pasenshi. Mescos mami y papi!”

Con bo ta experienciando di ta mama di morocho?

Mi no sa ki ta experiencia di un mama cu no tin morocho, pero simplemente di ta mama caba ta un experiencia super dushi. Ta hopi druk, hopi trabou, pero mi no lo cambia esaki pa nada di mundo. Nan a bin bolter mi bida ‘upside down’, cu ta pone mi wak e cosnan di diferente manera y ahusta mi prioridadnan y cambia cierto manera di pensa y haci. 

Un di e abusonan di mas grandi na Aruba ta negligencia di mayor. Kico abo ta considera ta e problemanan cardinal awendia cu e funcionamento pa ta un bon mama?

Higiena, salud mental y fisico, e reglanan basico, e norma- y balornan ami ta considera un fundeshi pa e mucha lanta cu ne. Hopi cos a bira “facil” y hopi biaha no ta traha tempo (calidad no cantidad) pa pasa cu e muchanan. Mi ta realisa cu tempo a cambia y awendia no ta facil pa lanta mucha, kiermen ta segun tempo ta pasa, e caracternan ta forma y e influencianan di afor ta tuma lugar. Como mayor bo tin cu keda guia bo yiunan riba e caminda corecto.

Como mama, bo ta sinti cu nos muchanan mester haya mas proteccion pa evita abuso di mucha? Of kico segun bo, por ta solucion pa preveni abuso di mucha?

Ta un topico dificil. Mi ta kere comunicacion ta esencial y siña e muchanan di trempan kico mag y kico no of kico por of no. Lamentablemente nos ta mira mas y mas cos ta pasa y lo mester purba na protega nan mas.

Como mama, kico ta e cualidadnan cu abo ta wak den un scol pa brinda bo yiunan un mihor futuro academico?

Ta algo cu mi mes ta kibrando cabes cu ne pa basta tempo caba. Haciendo investigacion di awor caba, paso mi yiunan tin solamente 1 aña, pero mirando con liher tempo ta bula, ta yega momento cu nan lo mester bay scol. Tin hopi scol aki na Aruba y bo ta tende hopi cos di tur. Mi no ta kere tin “scol malo”, pero mirando cu mi ta bin di un neishi di maestro y maestra (6 di 10 ruman di mi mama ta den enseñansa) mi ta kere cu mi tin djis un wowo poco mas critico.

Awendia un di aspectonan importante ta norma y balor. Kico ta bo norma y balornan como mama?

Mi a lanta den e epoca cu norma y balor manera; respet, bisa bon dia, den mi wowo ta e cosnan basico. Mi ta experiencia hopi hende tur dia y e no ta algo cu mi ta mira cerca tur hende. Den mi caso nos lo spera di por lanta nos yiunan cu Dios central, manera a lanta nos.

“Naturalmente bo ta purba keda den tempo moderno, pero serio e cosnan cu nos a lanta cu ne, bo kier pasa over pa bo yiunan. E no ta facil, paso tin e influencianan diferente cu nos a lanta den dje, pero cu tempo bo lo mester ahusta kedando cu e reglanan simpel cu un mucha ta lanta cu ne.”

Mirando cu bo ta dentista di profesion y ta activo den comunidad, kico bo ta opina di cuido di nos muchanan relaciona cu djente?

Ami semper ta enfoca cu e mayornan riba prevencion. Mescos un mucha ta siña come, baña, hunga, e cosnan cu nos ta wak como di mes, mescos mester siña skeiro djente y menos consumo di sucu. Cu un balans di e cosnan cu por duna e muchanan buraco y e cuido, lo por logra cu lo preveni e malesanan den boca y of buraco. E no ta mes facil cu mi ta bisa, paso mi tin un proyecto den Kiwanis Club of Aruba cu mi ta wak e muchanan cu no tin e recurso pa haya e cuido basico pa nan higiena oral. Si e mayornan cuminsa bay cu nan for di chikito, dentista y sigui cu e programa di sanacion via AZV, lo por baha e gastonan pa cu e cuido di e muchanan dentadura y dentista por detecta mas liher, yuda y conseha e mayornan pa cu cuido di dentadura di nan yiunan.