Tur aña riba 17 di mei, e International Communication Union (ITU) ta celebra dia di “World Telecommunication and Information Society Day”. ITU a wordo funda na 17 di mei 1965 y ta specialisa den tecnologianan di informacion y comunicacion (ICTs). Durante e ultimo lunanan, e pandemia di COVID-19 a subraya e importancia fundamental di ICTs pa economia y paisnan rond mundo. Mustrando mundo cu niun hende no ta safe te ora nos tur ta safe y cu nos no por uza ful e potencial di ICTs te ora nos tur ta conecta.
E tema di e aña aki ta “Connect 2030: ICTs for the Sustainable Development Goals (SDGs)”. Cu e tema aki, ITU ta reafirma e vision global pa desaroyo di e sector di telecomunicacion/ICTs cu ta premira un sociedad di informacion, empodera pa un mundo interconecta, caminda telecomunicacion/ICTs ta acelera y haci posibel crecemento y desaroyo social, economico y di medio ambiente pa tur hende.
Innovacion y tecnologianan nobo tambe tin un gran potencial pa e progreso humano y pa logra cada un di e Metanan pa Desaroyo Sostenibel. E decada di 2020 a wordo declara como e Decada di Accion, caminda ta importante pa mehora colaboracion y cooperacion pa fortalece e rol di ICTs pa realisa e Metanan pa Desaroyo Sostenibel.
Conexion na tur momento awor mas cu nunca ta esencial. Nos mester traha hunto pa cera e buraco cu tin entre esnan cu no tin acceso na internet y esnan cu si tin acceso. P’asina tur persona por ta conecta y por disfruta di e facilidadnan cu esaki ta ofrece como tambe sigura cu e bida conecta ta sigur y confiabel. SETAR, como nos compania nacional di Telecomunicacion, ta uni su mes na e promesa aki pa brinda e comunidad di Aruba conexion na tur momento como tambe lo ultimo den innovacion y tecnologianan nobo pa sigui avanza e comunidad di Aruba.
