Elite Productions Aruba a prepara un proyeccion unico riba e edificio nobo di Hospital, cu por wordo mira diadomingo awor dia 17 di mei durante e programa di television ‘Live Sessions’. E motibo tras di esaki ta pa duna honor na tur ‘frontliners’ cu ta trahando incansabel desde COVID-19. Rond mundo por a mira diferente forma creativo con a demostra nan aprecio, y aki na Aruba un di e ideanan ta pa hacie den forma di un ‘Video Mapping’ unico. E show visual lo inicia pa 8’or di anochi y ta pidi tur hende pa mire via Tele Aruba Canal 13 y tambe via Elite Productions Aruba su pagina di facebook.
E programa di diadomingo awor lo cuminsa pa 7 ‘or di anochi cu presentacion musical di e banda popular Le Groove. E banda aki lo presenta tambe diferente sorpresa musical cu lo hacie un anochi sumamente ameno pa sinta cu famia na cas y mira e concierto en bibo aki. Lo tin entrevista tambe cu Director di Elite Productions, Sr. Krish Mahtani, y Aruba Bank lo presenta su consehonan di siman cu ‘Bank Responsibly’.
E director creativo di Elite Productions a comenta cu a prepara un espectaculo visual cu lo hala masha hopi atencion. No solamente cu e lo ta prome biaha cu lo haci ‘video mapping’ riba e edificio, pero tambe e contenido lo ta hopi creativo pa duna danki na tur persona cu ta trahando constantemente den diferente departamento y of organisacion, pa asina tin tur cos bou control durante e temporada aki di COVID-19. Un danki grandi tambe na e team di Hospital di Aruba pa a duna e permisonan necesario.
