Un embaraso cu a keda hopi priva cu casi niun hende sabiendo, excepto famia, algun amistad hopi cercano of e hendenan cu a wak cu Gionina Engelhardt tabata na estado. E embaraso a bay basta bon y su bariga no tabata hopi grandi. E baby a nace dia 22 di April durante un parto normal aunke inicialmente Gionina tabata pa haya su yiu via un cesarea. E tata, Jonathan Alexander Kamsteeg, door di henter e crisis di COVID-19 no por tabata presente na e parto, debi cu e no por a biaha y el a keda pega na Corsou. Apesar di e situacion, e por a experiencia e parto via FaceTime danki na e tecnologia.
Nan prome post riba nan red social anunciando yegada di Hayden Cohnnery Alexander, tabata despues di un luna door cu nan kier a mantene e sistema mas ouderwets. Nan ta preparando pa haci un photoshooting familiar unda cu Gionina y Jonathan lo pose hunto cu nan baby y su ruman muher grandi Neyhiah Lykxienne Arends. Gionina tabata riba portada di FOCUS na September 2016, y e tempo ey el a bisa cu su futuro pareha mester ta un persona di un bon curason, humilde, respetuoso, stabiel y mas importante; trata su yiu muher super bon. Recientemente Gionina a comparti un potret riba su Instagram hunto cu su pareha durante parada di carnaval. Nos ta desea e pareha hunto cu nan yiunan hopi bendicion y felicidad.
