Despues di a canta tumba na 2019 y cu Edward a forma parti di e composicion, e inspiracion a surgi pa cuminsa experimenta y pone su ideanan riba papel. Asina e cancion “Tur Dia” a nace y durante e pandemia a termina esaki y mesora a drenta studio. Edward siguramente ta un artista cu ta reinventa su mes como cantante den un mundo unda musica ta keda evoluciona constantemente. E ta kere como cantante e mester keda al dia cu e trend p’e por tin un lugar den e industria.
E cantante a comparti su experencia bisando cu COVID-19 tabata un golpi duro pa nan como cantante y musico, mirando cu nan ta depende 100% di nan trabou cu ta basa riba turismo. Di otro banda como tata di dos yiu: Etto (12) y Angelly (6) hunto cu su pareha Angele, e tabata great di por a comparti cosnan conhuntamente. Nan a pasa casi 3 luna sin mester rush, paso mester a toca of tin otro afspraak. E tabatin su parti malo y bon!
E musiconan bon conoci riba nos isla manera Jeremy Bonnariba (drummer), Nelson Croes (Piano), Dennis Zavala (Trombone) y Armin Solognier (guitara) a forma parti di e single “Tur Dia”. Tyron de Freitas a graba e fillers, Colynery Media a haci e video clip mientras mix & master a wordo haci pa Nigel Maduro. Edward tin plan pa saca mas cancion cu otro artistanan local. Cu Tyron de Freitas tin un proyecto pa un cantica na Papiamento y tambe uno na Spaño y Ingles. E ta desea tambe pa sigui saca cantica na Papiamento combina cu Ingles y Spaño, pa asina e musica por touch base mas aya cu e Islanan ABC y kisas bira algo internacional. E idea ta pa traha riba un produccion di peso, pa asina por alcansa e mercado internacional!
E gradicimento special sigur di parti Edward ta pa tur esunnan cu a forma parti di produccion di tanto e cantica como e clip di “Tur Dia”. Y tambe na tur e modelonan y e guys di 7 Days Racing. Na tur radio stations pa por a lanse y last but not least na FOCUS Aruba pa semper sigui su trayectoria di cerca.
