E idea a nace pa inicia ‘BEAUTY Within Me’ mirando cu durante vakantie grandi casi nunca tin actividadnan, cu ta concentra riba e hobennan. E iniciativa pa crea e seminario aki ta di Jeanique de Palm, unda lo concentra riba e topiconan manera; ‘Beyesa – Desaroyo General – Salud’ di cada hoben. E criteria cu a uza pa yega na e escogencia di e topiconan aki ta, pa logra como meta principal pa cada hoben logra conoce un poco mas di nan mes, y pa na final por ta hobennan firme y sigur di nan mes den nos comunidad.
Jeanique de Palm su experticio como ‘runway coach’ y ‘dancer’ a hacie hopi popular den e eleccion- di reina y certamennan di beyesa ultimo añanan. Desde cu el a participa na Miss Teen Aruba International 2009, e pasion a keda y p’esey el a sigui yuda den background despues di su participacion. Sinembargo mirando cu e ta haya hopi hoben y preparador ta acerc’e, el a dicidi aña pasa di duna lesnan priva na e participantenan cu ta concursa den certamen di beyesa.
Pa su lesnan di pasarela Jeanique ta hinca tur su dedicacion y amor den cada candidata, pa e por aporta na resalta/crea lo miho di cada un. Danki na Dios e ta bisa cu 2019 tabata sigur un aña exitoso p’e, unda cada tres di e cantidatanan cu el a coach a logra e titulo maximo. Esta; Ileyna de Cuba – Miss Teen Aruba International 2019, Isabella Bendschop – Miss Youth Aruba 2019 y por ultimo Ray-shenne Girigori – Pre Teen Beauty Aruba 2019.
E trayectoria di Jeanique den e mundo di baile, a inicia desde su 9 aña di edad dunando diferente presentacion rond di Aruba. El a cuminsa cu Lollipop Dancers sigui pa Youth in Action y awor e ta formando parti di Coco Rico in Motion. E ta duna presentacion di carnaval na e hotelnan p’asina brinda nos turistanan un tiki di nos cultura. Tambe el a haya varios oportunidad cu Aruba Tourism Authority pa baila den exterior na diferente evento cu Aruba ta wordo promove internacionalmente. E grupo di baile ‘Dazzling Dancers’ tambe ta bou encargo di Jeanique, y ta existi pa 1 aña caba. E grupo ta conta actualmente cu 20 mucha entre edad di 4 pa 12 aña.
Jeanique a wordo forma como bailarina como integrante di e diferente gruponan di baile desde chikito, y pa loke ta modelahe el a ricibi su preparacion na My Dream Institute. Pa Jeanique e etapa aki ta nifica hopi mirando cu cerca Juffrouw Anoutcka, el a siña e base di pasarela y sigur e postura di elegancia. Algo cu sigur el a keda corda semper ta nan anochi di gala unda tur alumno tabata bisti di gala pa un anochi special, unda tur alumno por a presenta loke nan a siña durante e temporada. Sin lubida nan Anual Fashion Show cu sigur tabata trece hopi publico.
Bolbiendo na e seminario ‘BEAUTY Within Me’, a puntra Jeanique con lo mantene na e protocol di distanciamento di 1.5 meter pa cierto lesnan.
“Pa cu e distanciamento social nos tin algun ahustacion manera cu e protocol ta exigi. E studio unda e seminarionan lo wordo duna ta completamente drecha segun e protocol. Entre otro lo tin hand sanitizers disponibel, tape riba vloer pa asina marca e distancia di 1.5 meter y lo evita pa e hobennan tin contacto directo cu otro”.
Bo ta adaptando na e ‘new normal’?
COVID-19 a bin di sorpresa y niun hende a spera esaki, pero mi mester a adapta mi mes na e ‘new normal’ pa mi por sigui dilanti cu tur e metanan cu mi tin pa 2020.
Ki meta tin pa 2020?
Mi meta pa 2020 ta pone mi focus full riba Dazzling Dancers pa asina yuda cada mucha desaroya nan talento, y pronto cuminsa cu un categoria di hoben tambe.
E EXPERTONAN ENCARGA CU E TOPICONAN DI ‘BEAUTY WITHIN ME’:
Queen-Anne Bergen: Public Speaking
Jahë Bikker : Self-esteem Boosting
Larissa Bermudez: Self-esteem Boosting
Nurianne Arias Helder : Diabetes and Health advocate
Suhaila Alders: Photography
Jade Padron: Makeup Artist
Ebrina Current: Jeugd Diëtiste
Anoutcka Burleson: Etiquette y Protocol
Jeanique de Palm: Pasarela
