Den su seis añanan den e mundo di beyesa, George Bislip, a comberti den un nomber solido como make-up artist pa su logronan tanto local como internacional. E ta corda con el a cuminsa trahando pa Inglot garando experiencia y despues a sigui crece den loke ta e mundo di beyesa y moda. Cu añanan el a tuma diferente curso den e areanan aki, y poco poco a duna di conoce mas ken ta George Bislip hayando asina tambe reconocimento pa su trabou. Su prome portada pa revista tabata cu FOCUS Magazine edicion di december 2014, y for aki el a haya oportunidad pa traha mas den e area editorial y a saca diferente portada pa revistanan local.
Cu su trabou editorial el a haya un extra exposure caminda el a wordo yama pa makiya tanto artistanan local como internacional. George a traha pa diferente revista internacional manera: Tendendia Magazine (Venezuela), Portada’s (Venezuela) y Hola Latinos (Miami). E tabatin e oportunidad tambe di traha cu e siguiente artistanan: Maite Delgado, Caterina Valentino, Ximena Cordova, Fer Sosa y asina e sigui por menciona mas. Recientemente e ta formando parti tambe como makiyador di un reality show nobo na Miami bou di e number ‘Palm House’, cu ta un produccion di cantante/actor Federico Diaz.
IMPROVISA CON PA SIGUI LORA
Trahando independientemente como makeup artist, pa George Bislip e temporada aki ta un di e retonan mas grandi cu el a enfrenta den su carera. Su entrada principal ta directamente cu su clientenan cu e ta makeup, y e mester a para esaki pa su propio bienestar y pa esun di su clientenan. E mester a improvisa con pa sigui lora den e temporada aki, cu no tabata uno facil caminda su entrada ta 0,- E por a mira diferente ayudo tur caminda, pero a lubida riba nan cu ta artistanan independiente. Sinembargo semper el a keda optimista y crea ideanan nobo.
INFLUX
Hunto cu su trabou como makeup artist, George ta traha ya pa casi 1 aña caba, tur mainta na COOL FM den e programa INFLUX. El a tende un dia cu COOL FM tin un casting y el a bisa: Ban ‘try it out’! Mi a logra den e casting aki cu mi a por a crea un programa y asina INFLUX a nace. Hunto cu Vero nos a sinta brainstorm pa hinca e programacion den otro”. Cool FM ta un plataforma cu a habri e portanan pa George y e tin cu gradici Alex Ponson pa tur su apoyo y consehonan, como tambe Angie Lampe y su co-hosts Vero Avila y Laurisa Paskel. Mas cu colega nan ta manera un famia y di dialuna pa diabierna nan ta brinda e oyentenan e programa INFLUX, cu ta un talk show caminda cu nan ta comparti noticianan positivo y tambe informativo. Alabes nan ta educa dunando tips di un estilo di bida saludabel, tips di beyesa y trends nobo complaciendo asina nan oyentenan diariamente.
SPOTLIGHT BY GEORGE BISLIP
Manera cu tur hende mester a busca manera pa improvisa den e temporada aki, George a bisa: “Mi mes por y mi lo logra, y mi kier yama danki na cada un di esunnan cu a kere den mi y cu a support mi di un manera of otro, pa asina crea e concepto nobo aki cu ta SPOTLIGHT by George Bislip”. E idea di e programa di television ta un idea cu semper e tabatin. El a sigui y admira semper e programanan internacional manera E! Television, y di aki el a haya diferente inspiracion pa trece algo asina pa Aruba. E programa ta un concepto estilo E! cu ta un segmento pasa riba Beyesa, Moda y Estilo di Bida. George ta bay toca diferente topico den e areanan aki pa asina informa y educa e televidentenan. SPOTLIGHT by George Bislip cu su estreno ta diabierna awor 19 di juni, ta bay duna tips di diferente tema di beyesa cu bo mes por crea na cas como tambe recomenda cua luganan pa bishita. George lo bay tin su ‘wowonan skerpi’ eyfo pa wak e LOOKS pa trece den su seccion di fashion police. “Asina ta BE AWARE… Hahaha ? George ta finalisa bisando!
