Un gym na Rodondo Beach, California, a crea ‘workout pods’ cu ta capsulanan traha di un manera unico inspira door di COVID-19, pa asina proteha nan clientenan. E doño di ‘Inspire South Bay Fitness’ a construi nuebe capsula pa workout for di pipa di plastic y cortina di baño. E doño, Peet Sapsin, a bisa cu el a haya e idea aki ora el a wak con banco- y restaurantnan tabata uzando e divisionnan di plexiglass.
E capsulanan aki ta laga e hendenan haci ehercicio mientras nan ta practica e reglanan di distanciamento social. Ademas di e capsulanan aki tin otro protocol cu mester sigui manera uza sanitizer, tuma temperatura y firma un ‘waiver’ pa despues wordo asigna na un capsula pa entrenamento. Cada uno tin su mesun dumbbells y ekipo.
Segun e comentario di algun hende cu e capsulanan aki pa entrenamento ta mustra un poco estupido y probablemente ta hole horibel, pero esaki ta un forma bastante inteligente pa traha nan. Posiblemente e no ta detene totalmente e propagacion di e virus, teniendo na cuenta cu di un banda e ta habri y e microbionan ainda por ta bula den aire, sinembargo esaki ta miho cu nada.
E capsulanan aki a dura tres siman pa traha uzando manera ya menciona, cortina di baño y pipa, cu ta un alternativa compara cu e instalacion di ‘’plexiglass dividers’, cu lo por sali riba 10 mil dollar, segun e doño. E capsulanan lo laga e persona mantene 1.8 meter di distancia fo’i otro persona mientras ta haci nan entrenamento.
E doño a bin cu e idea aki door cu nan gym tabata cera pa tres luna, sin sa si nan por habri bek door di coronavirus. E ta bisa door di e solucion di e ‘gym pods’, nan por a habri bek y tambe ta un luga ‘safe’ pa nan clientenan. Maske nan ta habri, door di e reglanan di distanciamento social toch mester acepta menos hende compara cu antes. Awor e capacidad cu e gym por maneha ta 9 persona enbes di 16.
