For di e deseo di comparti su experiencia y conocimento den meditacion y cristalnan, Jessica Wolter a funda Gemmy Vibes, pa descubri e berdadero esencia y fortalece e desaroyo personal tanto di e hende muhe, homber como e muchanan, cu ta en busca di esaki. Hopi biaha ta den e momentonan dificil cu nos ta experiencia den bida, ta unda cu nos ta cuminsa busca nos berdadero ser y nos proposito. Y den e areanan aki Jessica a haci un proceso personal pa prepara y capacita su mes y asina por brinda un apoyo na e personanan den nan ‘spiritual awakening‘. Tur esaki sin laga atras su carera profesional den mercadeo y business.

Semper Jessica a sinti atraccion pa diferente cristal y tabata colecciona esakinan sin traha cu nan energeticamente na e momento ey. Algun aña atras el a sinti e necesidad di wak paden y haya sa cua tabata e berdadero proposito di su ser. Canando e caminda energetico y spiritual, el a descubri hopi aspecto di su bida cu e kier a fortalece y otronan el a laga atras, paso ya nan no tabata match cu su proposito di bida. E ta un caminda di evolucion constante y semper lo siña cosnan nobo pa mehora como persona. E tabatin e fortuna di conoce algun cristal cu a hibe na profundisa mas den su proceso personal, y cu awendia ta un gran apoyo den su practica di meditacion. Tur esaki a yude den su crecemento personal como tambe profesionalmente, ya cu pa medio di practica meditacion bo ta desaroya mas bo creatividad entre hopi otro beneficio como mehora bo salud mental y focus.

Den un sesion di crystal healing, e persona ta wordo guia door di un meditacion pa relaha su curpa fisico y mental, pa asina e focus den e momento presente. Depende di e aspecto cu ta bay traha riba dje, e cristalnan ta wordo selecciona y poni riba e persona mientras e ta den su estado di relahacion. Asina aki e por cuminsa na cera conoci cu su energia y e energia sutil di e cristalnan. Por ehempel tin uno cu ta esencial cu ta un balance di e puntonan energetico cu tambe ta conoci como chakras. Esaki ta wordo acompaña pa diferente cristal cu ta traha riba cada punto energetico. Tin hende cu tin nan puntonan energetico mas desaroya of kisas menos desaroya cu otro. E tipo di sesionnan aki ta yuda nos ekilibra nos puntonan di energia y mantene nos vibracion halto. Den quantum no ta existi tempo manera nos ta conoce den e mundo fisico cu nos ta biba aden. E practica di cada un di nos ta hopi personal. E ta depende di nos mes con lihe of facil nos ta laga atras tur loke ta attach nos na e mundo fisico, cu no ta aporta na nos bienestar holistico. Un ehempel ta emocionnan negativo di vibracionnan baho, cu no ta laga nos biba den plenitud nos momento presente den bida.  Jessica Wolter ta mayan anochi den e session LIVE riba e Facebook page di FOCUS for di 7:00PM-8:00PM.

LEAVE A REPLY

Please enter your comment!
Please enter your name here