Un noticia cu a hala hopi atencion den siman tabata e morto di e strea di 16 aña, Siya Kakkar, di India. E mucha muhe aki cu tabata famoso riba e rednan social, a mata su curpa na New Delhi despues di a ricibi menasanan. Siya Kakkar a atrae mas di 1 miyon di siguido riba TikTok cu su rutinanan di baile. El a wordo haya morto den su cas na New Delhi despues di un aparente suicidio.
Kakkar a post un video di su mes riba top di un edificio na New Delhi, oranan prome cu el a mata su mes, y e tabata smile den e clip. Segun fuentenan familiar, e adolescente tabata ricibi ‘menasa’ riba internet, pero polis a bisa cu nan no por a confirma e motibo den e etapa actual di e investigacion.
Kakkar su manager, Arjun Sarin, a bisa cu el a papia cu e strea di rednan social riba e dia di su morto, y a bisa cu e tabata parce di ta bon. E manager a sigui bisa cu esaki lo tin di haber cu algo personal… den su parti di trabou Kakkar tabata bon. El a papia cu ne riba proyectonan nobo y e tabata zona normal.
Aunke cu e ta mas popular pa su videonan di baile riba TikTok, e hoben di 16 aña tambe tabatin mas di 200 mil siguido riba Instagram. Riba rednan social, amigo- y personanan cu a traha cu Kakkar a expresa nan palabranan di pesame pa e morto prematuro di e hoben. Na principio di luna, e actor di Bollywood super famoso, Sushant Singh Rajput, tambe a wordo haya morto den su apartamento na Mumbai cu sospecho di suicidio.
