Un estudio realisa pa Universidad di Texas a revela, cu ora un hende ta sinti vulnerabel y cu ansiedad, tin mas probabilidad cu e ta bay basa su decision den informacion anecdotico en bes di informacion basa riba datonan. Segun Traci Freling, un di e autornan di e estudio, ta bisa cu esaki ta pasa specialmente ora e tin di haci cu emergencianan di salud. E tin un importancia hopi grandi den e situacion actual, unda globalmente tin preocupacion door di e coronavirus.
El a declara cu hende ta scucha mas na e storianan personal, cu e hechonan real door cu e emocionnan ta halto durante emergencianan di salud: “Nan ta specialmente indiferente na e factornan, si e incidente ta algo cu nan mes a experiencia. Nos ta wak cu ora un problema ta relata na salud, bida personal of algo hopi peligroso, nos proceso di haci desicion ta comprometi y e hendenan tin e tendencia di confia den anecdota”.
Traci a bisa cu e panico di cumpra papel di WC den e comienso di COVID-19 no ta basa den informacion di e echonan. Ta mustra cu e consumidornan cu ta sinti vulnerabel na un problema specifico, por duna preferencia na un anecdota subhetivo en bes di informacionan obhetivo y cu estadistica ora di haci decision. Contrario na ora e personanan no tabata involvi emocionalmente den un decision, evidencia estadistica tabata pisa mas cu informacion anecdotico.
Segun Traci: “Principalmente ora tin poco peliger of ta un problema cu no ta relaciona na salud, e hendenan tin tendencia di tuma informacion cu ta fuerte y friu”. E co-autor Ritesh Saini tambe a observa cu e hendenan ta haci decisionnan mas obhetivo ora nan ta haci decision pa otro hende, pero ta sorprendente cu pa nan mes nan ta bira iracional.
CUMPRA DEN PANICO
Dokter Ali Fenwick di Nyenrode Business University a atribui e cumpramento den panico na e celebro su ‘mode’ di sobrevivi, cu ta anula cualkier rason racional. Ali ta mustra 4 rason dicon hende ta cumpra den panico:
1. E manera di sobrevivencia
E parti mas primitivo di nos celebro ta tuma cargo ora un persona ta den un situacion insigur of peligroso. Nos ta cumprando iracional pa ‘sobrevivi’ a pesar cu gobierno ta duna siguransa cu no ta bay tin falta di cuminda.
2. E efecto di scarsedad
E momento cu productonan cuminsa disparce di supermercado, e hendenan ta cuminsa mira e productonan manera schaars y mas valioso. Esaki ta genera un impulso na unda nan ta mas dispuesto pa sali y cumpra, kisas pagando mas pa e productonan cu nan no echt mester. P’esey tin e acumulacion excesivo di cuminda y papel di WC.
3. “Herd Behavior”
Ora e hendenan rond di bo manera: famia, amigo y colega ta cumpra den exceso, tin un tendencia pa tambe haci mescos cu nan.
4. Sentido di Control
E restriccionnan externo manera: toque de queda, ceramento di e frontera y distanciamento social durante un pandemia global, ta causa hopi insiguridad. Dr. Ali ta argumenta cu e restriccionnan externo ya menciona ta crea un necesidad interno di eherce control manera un forma pa sinti sigur. E posibilidad pa cumpra producto ta duna un hende e sentido di control riba su alrededor.
