E famia di e artista Ricky Martin ta mustra di ta creciendo poco poco, y pa prome biaha el a publica un imagen di e famia completo, unda el a pose hunto cu su cuater yiunan y su casa. Na 2008 e cantante a ricibi su morocho Matteo y Valentino, y 10 aña despues el a presenta su bunita yiu muhe Lucía. Aunke a pensa cu te eynan su famia lo crece, sinembargo na october aña pasa, el a laga su fans cera conoci cu su yiu Renn, su prome yiu cu el a haya ora e ta casa caba cu Jwan Yosef.

E fans di e astro boricua a ricibi cu emocion cada uno di e potretnan di e cantante, cu el a publica a traves di su rednan social, pero e post awe a causa un total euphoria ora el a share e prome potret di su famia completo.  A pesar cu e artista ta hopi reserva ora ta trata di expone su famia na e mundo virtual, riba e potret blanco y preto cu el a post awe, e ta aparece hunto cu su casa, e artista plastico Jwan Yosef, su yiunan: Lucia, Matteo, Valentino y Renn den e mesun setting.

E artista a skirbi riba su Instagram cu e potret ta forma parti di un sesion exclusivo cu nan a haci pa e edicion britanico di e revista Vogue, cu ta relata ‘Life under lock down’. Den algun ora cu el a post e potret, esaki a acumula mas di 400 mil likes, entre otro di Dua Lipa y Alicia Keys, y di Aruba por mira cu dentista Yelitza Domacassé-Helmeyer tambe a duna su like.

View this post on Instagram

Happy #pride everyone!! . 🟥🟧🟨🟩🟦🟪⬛️🟫

A post shared by Ricky (@ricky_martin) on

Ricky Martin na 2008 a dicidi di crea un famia y a traves di un ‘draagmoeder’ y el a haya Valentino y Matteo, cu actualmente tin 11 aña. Dos aña despues, e cantante a duna di conoce tocante su preferencianan sexual y na 2018 el a sorprende tur hende cu e noticia di su matrimonio cu Jwan Yosef. E mesun aña el a haci conoci cu un miembro nobo di e famia cu yama Lucía y na 2019 el a welcome su di cuater yiu cu ta yama Renn. Algun dia pasa Ricky Martin a comparti un potret unda e ta sunchi cu su casa pa conmemora  International Pride Day, loke a impacta su siguidonan cu ta celebra e echo cu e cantante semper ta apoya e movimento.

LEAVE A REPLY

Please enter your comment!
Please enter your name here