Hilton Aruba Caribbean Resort & Casino recientemente a haci un donacion generoso di 70 mesa banquet nobo nobo na fundacion- y organisacionnan social local, coordina por medio di bureau di Ministerio di Asuntonan Social. Blue Energy Committee na Hilton Aruba Caribbean Resort & Casino a tuma contacto cu e bureau di Ministerio di Asuntonan Social pa identifica e necesidadnan di e mesanan nobo.
E miembronan di e comite a coordina y brinda e mesanan na 15 diferente organisacion y fundacion: Imelda Hof, Casa Cuna, Grupo Walishali, Grupo Kawara, Grupo Magdalena, Grupo Kibrahacha, Centro di Bario Noord, Centro di Bario Santa Cruz, Centro di Bario Savaneta, Centro di Bario Tanki Leendert, Pica Piedra Speel School, Curason Contento Peuterschool, SVGA, Pasadia Infantil Te Aworo y Ambiente Nobo. Cada un di e fundacion- y organisacionnan aki, den nan mesun manera a yuda sostene y continuamente duna bek na e comunidad, pa asina yuda sostene e esfera special riba nos isla.
“E miembronan di e team ta sinti nan mes honra di por yuda organisacionnan social y fundacionnan na Aruba,” Glenn Farro, director di recursonan humano ta bisa. “Nos ta sinti cu e ta nos responsabilidad pa duna bek na comunidad cu a sostene nos y brinda nos asina hopi apoyo.”
E Blue Energy Committee na Hilton Aruba Caribbean Resort & Casino, cual ta yuda planea e resort su diferente actividad comunitario, a sinti cu e proyecto ta fit perfectamente cu e compania su filosofia riba inversion den comunidad local. E filosofia aki a prevalece den e compania pa mas cu 100 aña caba, determina pa sigura crecemento sostenibel y sigur pa un y tur.
