E actriz Naya Rivera ta perdi desde ayera den Lake Piru na California, unda el a bay hunto cu su yiu homber Josey di cuater aña. E strea di Glee a huur un pontoon boat ayera merdia y 3 ora despues un otro navegante a bati alarma ora cu el a wak e boto ta drief, cu un mucha drumi a bordo. E chaleconan salbabida ta un norma pa uza den e lake, sinembargo a haya esun di Naya den e boto pero su yiu si tabatin di dje bisti. Segun e autoridadnan di Los Angeles a informa, cu ora a interoga e yiu chikito pa sa e paradero di su mama, el a contesta cu el a bay landa y no a bolbe mas.
Lake Piru ta keda 60 miya di e cas di Naya Rivera y 20 miya di unda el a crece na Valencia. E fans di e actriz a haci un peticion na Ventura County pa nan resumi e buskeda y nan a recauda 5000 firma den e prome ora. Naya Rivera a share un potret conmovedor di dje y Josey un dia prome di su desaparicion cu e caption: just the two of us. Riba e Instagram di e actriz ta comun pa mira e potretnan di dje hunto cu su yiu chikito, cu e ta comparti e custodia cu su ex, e actor Ryan Dorsey, di ken el a divoria na 2018.
