Kelly Preston, casa di John Travolta, a muri ayera victima di cancer di pecho na edad di 57 aña. E dos ultimo añanan el a lucha contra e enfermedad, pero ayera e actor di Grease a duna e noticia a traves di su Instagram. El a comparti cu ta hopi duro informa cu su bunita casa Kelly, a perde e bataya di dos aña contra cancer di pecho. El a lucha cu balentia, cu e amor y apoyo di hopi. Su famia y e ta agradecido cu su dokter- y enfermeranan, Kelly a opta pa mantene su lucha den priva, unda e tabata haya tratamento medico pa algun tempo cu e apoyo di su famia y amigonan mas cercano, segun un representante di e famia a informa na un medio di comunicacion, Na september 2019, Travolta y Preston a celebra 28 aniversario di nan matrimonio y den un post John Travolta a comparti un mensahe di feliz aniversario na su casa. Den su trayectoria como actriz, Kelly a participa den e peliculanan manera: SpaceCamp, Jerry Maguire y For Love of the Game, siendo su ultimo actuacion na 2018 den e pelicula Gotti .
Lisa Marie Presley a keda inconsolabel despues cu su yiu homber mayor y cu tin hopi parecido cu su welo, Elvis Presley, a muri di un presunto suicidio. Benjamin Keough, di 27 aña, a ser haya pa polis cu herida di bala na e parti ariba di su curpa, ayera 6:30 di mainta den e mansion Calabasas di su mama na California. E manager di Lisa Marie a bisa cu e ta completamente inconsolabel, pero ta purba mantene fuerte pa su morocho di 11 aña y su yiu muhe Riley. Lisa Marie tabata adora su yiu homber y e tabata e amor di su bida. Un fuente cercano di e famia a afirma cu Benjamin tabata ‘struggling’ pa basta tempo, y cu su morto aunke cu e tabata un shock, no tabata un gran sorpresa. E mama di Benjamin ta e unico yiu di Elvis y Priscilla Presley, Lisa Marie a perde su tata tempo cu e tabatin nuebe aña di edad. Lisa a casa cu Danny Keough, e prome di su cuatro esposonan y hunto e pareha tin dos yiu, Benjamin y Riley, cu ta casa cu su coprotagonista di Mad Max, Ben Smith-Petersen. Na 2009, Benjamin a firma un contract discografico di $ 5 miyon cu Universal y semper el a mantene un bida ‘low profile’ apesar cu ta bin di un famia famoso.
