Rotaract Club of Aruba a inicia un bunita proyecto cu e meta pa recauda material di scol pa muchanan den necesidad. Durante fin di siman voluntarionan tabata presente na Dyon Center pa asina colecta e donacionan for di tur esunnan cu kier contribui na e proyecto.
Aruba Bank ta aplaudi e iniciativa y kier a uni su mes na e proyecto pa yuda mas mucha cu ta posibel y asina confirma nan compromiso cu nos comunidad y sosteniendo nan pilar strategico “We Care”. Representante di Aruba Bank, Roxanne Croes, a sorpresa e miembronan di Rotaract door di redobla e cantidad di donacion cu nan a logra colecta riba e dia aki. E miembronan di Rotaract a keda hopi agradecido cu e contribucion di Aruba Bank.
