E royal wedding mas posponi di e monarca britanico a ser efectua diabierna 17 di juli, ora prinses Beatrice di York y Edoardo Mapelli Mozzi, a bisa e tan anhela “Si”, pero e mester tabata den un forma intimo y discreto. Esaki no solamente pa e pandemia di coronavirus, sino tambe pa e escandalo cu ainda ta persigui e tata di e novia, prins Andrew, door di e caso di e fayecido Jeffrey Epstein. Den un comunicado emiti pa e cas real nan a informa, cu e pareha a dicidi di celebra un ceremonia chikito y priva, cu nan mayor- y rumannan despues di a pospone nan boda.
Na homenahe na su wela, prinses Beatrice a bisti un shimis vintage di Norman Hartnell, cu el a presta for di reina Elizabeth. E shimis di bruid di e prinses ta un model cu e reina a bisti na dos ocasion den decada di sesenta. E bisti elegante ta traha di tafetan di Peau De Soie den tono marfil, dorna cu satin dukesa y tambe cu manga di organza. E parti ariba di e shimis ta dorna cu diamante y e areglonan a ser haci pa Angela Kelly, modista personal di e reina, pa pas na e curpa di Beatrice. E novia real di 31 aña, a agrega su propio toke personal na e shimis cu e manganan transparente.
E joyero britanico, Shaun Leane, cu a diseña e renchi di compromiso di Beatrice, tambe a ricibi e honor pa crea su renchi di casamento. E impresionante diseño di platino y diamante, ta fit den e renchi di compromiso pa asina e dos renchinan uni na perfeccion. Ambos renchi a wordo elabora na man den e atelier di Shaun Leane Mayfair, cu e diamantenan di e miho calidad.
Beatrice a uza e mesun tiara cu su wela a bisti 73 aña pasa dia di su casamento, tempo cu e tabata prinses Elizabeth, cu e duke de Edimburgo na 1947.
