E manifestantenan a reuni na London diadomingo siman pasa pa protesta contra e uzo di mondkapje pa cara, dianan prome cu a bira obligatorio pa uza protector facial den e tiendanan na Inglatera. Un grupo chikito na Hyde Park den e centro di London, a expresa nan oposicion pa e uzo di mondkapje, despues cu e prome minister, Boris Johnson, a anuncia cu e lo bira obligatorio pa uze den tienda.
Algun manifestante tabatin borchinan cu ta referi na e mondkapje manera aparato di “mind control”. Mientras otronan tabata promoviendo teorianan di conspiracion incuyendo e teoria di ‘flat earth’ y tambe e supuesto link entre 5G y COVID-19. Varios di e manifestantenan tabatin mondkapje poni pa ilustra nan oposicion contra e mondkapje. E hendenan tabatin borchinan cu ta bisa ‘No Mask’. Un otro persona tabatin un flanel cu ta bisa “salba derecho humano, bisa no na 5G y no na vacunacion”. E resultadonan di varios estudio ta mustra cu e coronavirus ta wordo propaga a traves di e transmision den aire, y e uzo di mondkapje ta e forma mas efectivo di detene e propagacion di e virus.
