Den su prome podcast, Michelle Obama, ta corda cu tristesa con e y su famia a biba e atakenan racista den e bisindario unda nan tabata biba djis pa nan color di cuero. Michelle a conta con un hende a raska e auto di su tata, djis paso nan tabata e hendenan color scur di e bario. Michelle a biba na cas di su omo den e bario di South Shore na Chicago. El a detaya cu su mayornan a huur e segundo piso di un cas, y su famianan tabata biba abou. Cu e serenidad cu ta caracterisa su discursonan, Michelle a conta na su auditorio con el a transforma e racismo cu e tabata biba dia pa dia den resiliencia. Nan a influi den e desicionnan cu el a tuma den su bida. Tabatin un bisindario, un comunidad, famia extenso, structuranan alrededor cu a yuda e famianan pa cria nan yiunan den un ambiente amoroso, den su mayoría, Michelle a bisa.  

E ex-prome dama di Merca a comenta cu e bario unda el a biba e episodionan lamentabel poco poco a ser deshabita pa e prehuicionan y cu tempo a transforma den un bisindario di hendenan afroamericano. Pero esey no tabata e unico incidente racista cu e tabata victima. Tempo cu el a drenta universidad, e mama di su ‘roommate’ a exigi pa cambia su yiu muhe di camber, pasobra e no tabata kier pa e biba hunto cu un hende ‘preto’. Den su buki Becoming e ta apunta: “Mi a enfrenta e mas universal di e desafionan: Concilia ken bo ta cu e luga di unda bo ta bin y e luga unda bo kier bay”.

Manera tabata di spera cu su casa, Barack Obama, tabata e prome invitado na e podcast di Michelle. Nan a combersa riba nan famianan, den e entorno den cual nan a crece y con ta compronde awor e lucha pa e igualdad na Merca. Ambos ta di acuerdo cu e poblacion hoben tin mas consciencia riba e problema cu racismo ta representa den e ambito social, economico y di genero. “E unico cos cu ta preocupa mi ta, cu nan no ta vota”, Michelle a señala. “Mi ta kere ta pasobra nan a ser educa den e creencia cu e gobierno no ta funciona”, e ex mandatario a agrega. Den su podcast, produci pa e mes, Michelle lo reflexiona riba diverso tema personal y social, y lo conta cu invitadonan cercano manera su mama, su ruman homber y su miho amiga.

LEAVE A REPLY

Please enter your comment!
Please enter your name here