E team di Cosecha y artesanonan afilia ta celebra awe e prome lustro di Cosecha. 5 aña pasa e tienda di artesania Cosecha a habri despues di investigacion, dialogo y organiSacion extenso, algun aña caba procedente di Departamento di Cultura Aruba, ora a constata cu e artesania traha na Aruba tabata mester un plataforma prominente pa contra-aresta e desaroyo di artesania y souvenir di Aruba importa. Fundacion Centro pa Reenforsa Artesania y Forma Talento, esta C.R.A.F.T., a ser funda y di eynan Cosecha por a wordo estableci, cuminsando cu 25 artesano y artista, den e bunita monumento na Zoutmanstraat 1. Porfin e obrero culturalnan aki a haya un plataforma tangibel, e balor y atencion cu nan merece. Actualmente Cosecha tin alrededor di 80 artesano representa den e tiendanan di Oranjestad, San Nicolas y e kiosko pafor di e cruiseship teminal.
Tur e artista- y e artesanonan aki tin e Seyo Nacional di Artesania pa e productonan cu Cosecha ta bende pa nan. Asina e consumidor por ta sigur cu e producto artesanal ta wordo traha na Aruba. Aparte di e prome tienda na Playa, dia 26 di november 2016 directora di Cosecha, Joanne Dirksz, hunto cu su team y bestuur di Fundacion C.RA.F.T. a habri Cosecha San Nicolas. Un espacio hopi amplio na unda e meta pa duna workshop bou guia di artesanonan a bira realidad. E edificio aki por reconoce door di e colorido mural riba dje di 2 flamingo cu a wordo pinta durante e Aruba Art Fair. Den 2019 a sigui otro expansion y a habri un kiosko pafor di e cruiseship terminal. E kiosko ta chikito, sinembargo e ta brinda producto cu Seyo tambe. Aki e turista ta haya guia con pa e yega na e otro tiendanan como tambe haya informacion di Aruba y tayernan di artista y artesanonan.
Den 2020 door di e situacion di COVID-19 unda cu e mundo online a haya un rol mas prominente, Cosecha a encamina e proceso pa habri un webshop cu por facilita aun mas e experiencia di compra pa cliente di Cosecha. Via e webshop Cosecha ta extende su servicio pa brinda artesania y arte local online tambe tanto pa e mercado local como esun internacional. Na un manera safe y facil por cumpra piesanan unico y autentico. Por encontra e webshop na e tab “shop” riba e website di Cosecha www.arubacosecha.com of por bay directamente na www. shop.arubacosecha.com Cosecha ta cera cinco aña cu logronan importante pa artesania di Aruba, parti di Aruba su industria creativo, p’esey ta duna un danki special na tur artesano y artista cu ta parti di Cosecha, tur cu ta of a traha den pasado na e tiendanan. Tambe na tur cu ta of a forma parti di e bestuur di Fundacion C.R.A.F.T., hasiendo esaki a base boluntario y cu hopi animo. Cosecha ta orguyoso di e talentonan local y ta percura pa sigui desaroya su servicio. Pronto Cosecha lo lansa un proyecto interactivo pa celebra su prome lustro, cu sigur lo ta un estimulo nobo riba e tereno artesanal di Aruba, pues keda pendiente pa mas informacion.
