No tin duda cu esaki ta un tempo basta dificil pa Ellen DeGeneres. E testimonionan di su ex-empleadonan tocante e ambiente toxico cu ta respira den e produccion di ‘The Ellen Show’, a wordo multiplica cu e publicacion di un segundo articulo di BuzzFeed, den cual ta papia pa prome biaha di acoso sexual y comportacion inapropia di parti e productornan ehecutivo di e programa.
E segundo ola di acusacion a yega despues cu e strea di television a manda un carta na su trahadornan actual, den cual e ta reconoce cu e mester a dedica mas tempo na garantisa e bienestar di nan tur enbes di delega su responsabilidadnan, sperando cu nan ta ser cumpli segun e standard cu el a trata di establece.
E celebridadnan cu antes tabata sinta aparentemente encanta den nan stoel pa Ellen entrevista nan, a keda keto y otronan, manera e actor y comediante Brad Garret di e serie ‘Everybody Loves Raymond’, a sigura cu e berdadero personalidad di Ellen tabata un ‘stem secreto’ den e industria. “Mi conoce mas di un hende cu el a trata di un manera horibel”, e interprete a afirma via Twitter. E situacion a yega na tal punto cu casa di e presentadora, Portia de Rossi, a sali na su defensa pidiendo publicamente ayudo na esunnan cu algun luna pasa tabata considera nan como un di e parehanan mas solidario den e mundo di entretenimento. “Na tur nos fans… nos sa cu nan t’ey, Danki pa tur boso apoyo”, e actriz a skirbi riba su Instagram pa trata di pone na marcha un campaña cu e hashtag #I Stand By Ellen. Apenas algun dia pasa a circula e rumor cu e situacion ta asina sofocante pa Ellen, cu e ta considerando seriamente pa cancela su programa di forma definitivo pa scapa di e polemica den cual el a haya hinca den dje.
