Den e serie di entrevista cu FOCUS Online a post tocante e ‘lockdown’ na maart, un di e personanan cu a comparti con e tabata bibando na Hulanda, ta Javier van der Biezen. Desde dia 5 di augustus Javier ta bek na Aruba y e ta sintie bon aki bek na su isla, apesar di e situacion cu nos ta pasando aden actualmente. E sentimento di ta cerca famia y amistadnan toch ta dun’e un sentimento di siguridad apesar di e circunstancianan. E temporada cu e tabata na Hulanda despues di cuarentena, e ta bisa cu poco poco tur cos a regresa na un normal nobo, cu e borchinan indicativo y e precaucionnan necesario, pa asina mantene bo mes y otronan mas ‘safe’ posibel. Bida mester sigui y segun Javier cu ta algo natural cu bo ta purba bay na bo habitonan di antes, pues e por bisa cu despues di cuarentena e mes a baha su ‘guard’ basta y despues cu e casonan a bolbe cuminsa subi, el a bolbe cuminsa pone mas atencion na e protocolnan di higiena.
Na Hulanda entre su friends Arubiano nan a haci tur locual nan tabata kier a haci, pero semper cu tabata den nan mesun circulo. Nan a sali of organisa anochinan festivo cu otro pa asina toch haya un tiki sentido di e normal. Aworaki cu e ta na Aruba cu e ta experenciando e brote di COVID-19, e ta haya hopi lamentabel cu e tin amistadnan hopi cerca di dje cu a test positivo y tambe conocinan. E ta haye un situacion alarmante mirando cu nos ta un isla hopi chikito y nos recursonan na e momento aki ta limita. Su experencia ta uno caminda cu el a bira hopi skerpi den sigui e protocolnan di higiena y casi e no ta sali for di cas. Javier ta kere ta necesario pa tur hende duna di nan parti pa cuida nan mes y otronan, y pa asina un biaha mas nos ‘flatten the curve’.
Javier ta tumando tur e precaucionnan manera tur hende, e tambe ta bisti su mask tur caminda cu e bay, asta den auto ora e ta cu otro hende. El a percura pa su cas tin suficiente vitamina y suplementonan pa asina yuda na hisa e sistema inmulogico tanto di dje como su famia. Nan ta haci nan cas tambe regularmente limpi y ta purba na desinfecta tur cos. Su conseho como un hoben cu a experencia e pandemia riba un nivel mas halto na Hulanda ta kere ta bon pa tur hende tuma e precaucionnan na serio, pa motibo cu porta abo mes por haye hopi leve pero bo ta core e riesgo di pega un ser keri di bo cu no tin mesun suerte. Si tur hende duna di nan parti ‘in no time’ nos lo tin e virus un biaha mas domina.
