Dialuna ultimo 17 di augustus 2020 a tuma luga e ‘graduation y research presentation’ di Keyla Reeder, caminda el a presenta su tesis pa su Bachelor titula ’E rol di famia den reintegracion di e pashentnan di Respaldo’. E tesis aki sigur ta fungi como un fundeshi pa mas estudio den futuro tanto na Aruba como den Caribe riba e tereno di salud mental, y e rol cu e famianan ta hunga den e proceso y tratamento di e pashentnan cu un malesa psikiatrico of mental. Keyla Reeder a completa su ultimo stage exitosamente na Respaldo.
Na juli 2019 Keyla a ricibi un scholarship di Universidad di Amsterdam pa asina forma parti den un ‘summer school program’ titula ‘A Peaceful Mind: Mindfulness and Compassion-based Interventions’. Den su cuater añanan na Universidad di Aruba, Keyla a completa su stagenan na Centro di Memoria, Sociaal Psychiatrische Dienst (SPD) y na Respaldo. Siguramente su pasion y interes pa e area di salud mental tabata visibel durante su trayectoria y estudio na Universidad di Aruba. Apesar di e temponan dificil y insigur cu e pandemia di e COVID-19 a trece cu ne, Keyla a logra completa su tesis y asina gradua oficialmente como un Trahado Social cu un total di 272 ECTs.
Keyla ta un graduado di Colegio EPI Hospitality & Tourism, y despues di a traha 2 aña den departamento di Recurso Humano, el a haya e inspiracion pa continua su estudio den e ramo di trahado social pa asina por brinda e sosten y ayudo necesario na tur persona. Actualmente Keyla ta den e proceso pa cuminsa su pre-master na Universidad di Utrecht caminda e lo sigui su estudio di Masters den Clinical Child, Families and Education Studies (orthopedagogiek). Den futuro Keyla ta spera di por sigui contribui den e ramo di salud mental y investigacion. Palabranan di danki ta bay na cada un persona cu a duna nan tempo, sosten y aporte den e proceso di realisa e tesis aki.
