Recientemente, Kiwanis Club of Aruba, Kiwanis Club of Palm Beach, Kiwanis Club of Young Professionals Aruba y Kiwanis Club San Nicolas a uni forsa pa asina ehecuta e proyecto anual di ‘Back to School’ pa e muchanan den necesidad. E aña aki, cada club a scoge un scol basico y asina a yega na un lista di e muchanan cu a bin na remarca pa forma parti di e proyecto. E scolnan cu a wordo selecta: St. Aloysius School, Colegio Felipe B. Tromp, Fatima College, Commandeur Pieter Boerschool y Colegio Laura Wernet Paskel.
E añanan anterior, e miembronan di Kiwanis a compaña e muchanan pa cumpra nan paña di scol y despues di e compra a sigui un di dia yena cu actividad recreativo. Mirando e crisis cu nos isla ta pasando aden door di COVID-19 y e medidanan preventivo di salud y higiena impone door di Gobierno di Aruba, e aña aki e proyecto a conoce un cambio. E miembronan no por a bay haci compra cu e muchanan. Na luga di esaki, e muchanan a haya un certificado pa asina nan por bay haci compra cu nan mayornan. Den fin di siman e miembronan di e clubnan a sea entrega e tasnan na cas di e muchanan of a entrega e tasnan na e cabesante di e scol pa asina esaki wordo entrega na e muchanan.
Un total di 80 mucha a ricibi ayudo cu nan articulonan pa cuminsa e aña escolar nobo.
Tur mucha a ricibi un tas yena cu articulonan di scol manera: etui, pen, potlood, stift, schrift, etc. Ademas e proyecto di “Back to School” a cubri tanto uniform como tambe jeans, keds, mea y paña interior. Pa yuda proteha e muchanan, cada un a haya un tapaboca y un hand sanitizer.
E gasto di e proyecto aki ta wordo cubri cu e fondonan cu e clubnan di servicio ta recauda durante aña como tambe pa medio di patrocinio y colaboracion cu diferente compania na Aruba. Kiwanis kier a tuma e oportunidad aki pa gradici tur esnan cu den un forma of otro a contribui na e proyecto. Por ultimo Kiwanis kier a desea tur studiante un exitoso aña escolar 2020-2021 yena cu hopi energia, bendicion y sabiduria.
