E aña aki den un forma diferente compara cu e añanan anterior, Eastern Canada & The Caribbean District di Kiwanis International, a anuncia y reconoce e club- y miembronan den un forma virtual innovativo y creativo via e plataforma di Zoom. E “Awards Ceremony” por a wordo mira en bibo via di e pagina di Facebook di EC&C, unda a por a sigui e programa di “Kiwanis International Distinguished Recognition” pa e Aña Kiwanistico 2018 – 2019.
Den e añanan anterior dicho reconocimento a wordo presenta durante e congreso di “Eastern Canada and The Caribbean District of Kiwanis International”, caminda 268 club cu ta forma parti di e districto ta reuni pa trata puntonan di atencion pa e division y districto como tambe di Kiwanis International. E miembronan ta intercambia idea, atende diferente tayer educativo y e clubnan ta duna un reporte di nan progreso den e ultimo kwartaal, ademas di e proyectonan cu lo ser realisa den e proximo lunanan nos dilanti.
Kiwanis Club of Aruba a ricibi e “Distinguished Award” pa e aña Kiwanistico 2018 – 2019, bou di e liderazgo di Edalitza Weller, cu a ricibi e reconocimento di Distinguished President y George Croes como Distinguished Secretary, pa e trabou extraordinario y cu excelencia cu nan a sa di desplega. Pa prome biaha ta reconoce dos miembro di Kiwanis Club of Aruba cu e pin di “Distinguished Member”, pa nan esfuerso, dedicacion y excelente trabou. E dos miembronan aki ta Ryan Kock y Aurora Dijkhoff, ambos tambe tabata president di e club. Ryan Kock a ricibi e reconocimento pa su trabou cu e ta eherciendo e ultimo añanan como “chair” di miembrecia. Aurora Dijkhoff a ricibi e reconocimento pa su gran contribucion como parti di e comision di “fundraising” di Kiwanis Club of Aruba.
E trabou como boluntario cu e miembronan di Kiwanis Club of Aruba ta realisa cu amor pa e comunidad di Aruba, a ser reconoci cu un Lieutenant Governor Award durante e aña Kiwanistico 2018-2019 di Division 26 EC&C District. Tambe Kiwanis Club of Aruba a ricibi Distinguished Awards di tanto Kiwanis International y Eastern Canada and the Caribbean District di Kiwanis International. Kiwanis Club of Aruba ta gradici su miembronan pa nan amor y pasion pa sirbi e muchanan y comunidad di Aruba.
