Den un ambiente ameno y priva a tuma luga e coronacion oficial di Lizayra Tromp-Polak, Sra Virtual Internacional 2020 y Alexia Chin, Virreina Juvenil Virtual Internacional 2020. E bistimento di e sjerp cu e titulo internacional oficial aki pa tanto Alexia Chin y Lizayra Tromp-Polak tabata den man di Aurora Dijkhoff di revista FOCUS. Lizayra Tromp-Polak tabatin e honor di haci e coronacion oficial di Alexia Chin como Virreina Juvenil Virtual 2020, mientras Jennifer Croes-Veeris a corona Lizayra, como e prome Sra Reina Virtual Internacional 2020. Ambos concursante a participa den e certamen Reina Virtual Internacional, cu tabata bou encargo di e Venezolano, Alessandro Pineda.
Pa mas di dos luna nan mester a haci diferente reto, entro otro; talento, actuacion, noticiero y gala.
Nos no por keda sin remarca cu tanto Alexia y Lizayra a sa di posiciona nan mes den top 5 for di cuminsamento caba, captando atencion cu nan personalidad. Como reto final mester a traha un comercial, pa tur sponser di e certamen. Tur puntuacion cu a acumula a stop y a bay bek na 0. Como resultado Lizayra Tromp-Polak a keda elegi como Sra Virtual Internacional 2020 y Alexia Chin elegi como Virrreina Juvenil Virtual Internacional 2020. Alexia Chin ta 4th runner-up di Miss Youth Aruba 2019 y Lizayra Tromp-Polak mes tabata su trainer y mentor.
Nos Prome Minister, sra Evelyna Wever Croes, a manda un bunita mensahe na Ingles, mirando cu ta trata di un certamen internacional pa ambos representante bisando:
“E evento aki ta uno special, mirando cu ta prome biaha cu nos ta corona un reina virtual, esaki ta un prueba con innovacion ta mehora nos calidad di bida, specialmente durante e periodo di e pandemia di Covid. Como Minister encarga cu innovacion na Aruba, mi ta hopi orguyoso pa wak cu nos certamennan tambe a bay virtual. Como Prome Minister di Aruba e ta felicita nos ganadornan: Lizayra Tromp-Polak y Alexia Chin pa e logro aki. Sigur e no tabata facil durante e temporada dificil aki cu nos ta bibando aden, pero nos ta hopi orguyoso di boso logronan. Nos ta gradici boso pa a sa di mantene Aruba su nomber den halto”. Sigur e lo tabata desea di ta presente, pero esaki no tabata posibel. Pero e no kier a laga e oportunidad aki pasa, sin gradici ambos pa e bunita trabou cu ambos a haci pa promove Aruba.
Despues di e speech di nos Prome Minister, ambos candidata a dirigi palabra pa gradici un y tur cu a haci nan participacion posibel. Miss Youth Aruba, bou encargo di su director Robin Croes-Ponson ta felicita ambos candidata cu nan logro. E anochi di coronacion lo no tabata posibel sin e coloboracion di revista FOCUS, Aruba.TV, Swingmasterz, B-day & More, My Trucks Rental Services, Jennive Hi-Fashion, The Salon, Pierreson Thielman, Emmy Loves Cake Boutique y C&G Savory & Sweets.
