E edicion di FOCUS Digital pa e luna di october ta disponibel a traves di FOCUS App, y riba e portada ta ilustra 1st Runner-up di Miss World 2001, Zerelda ‘Zizi’ Lee, cu ta comparti e etapanan di su bida y di e promesa cu el a haci na su mama. Desde 2005 e ta bibando na Belgica hunto cu su casa Stijn, cu el a conoce na Aruba y nan dos yiu homber; Xilan y Tristan. Lesa tur loke Zizi a logra durante e ultimo añanan y ki Aruba ta significa p’e y su famia.
Den e edicion di october por lesa tambe e entrevistanan interesante relaciona cu e experencia di diferente persona durante e crisis di coronavirus. Dokter Rebecca Dijkhoff, cu ta trahando actualmente na Zuyderland como IC-arts y ta responsabel pa e cuido intensivo di e pashentnan mas malo den e hospital. Durante e pandemia actual el a traha non-stop cu e pashentnan di COVID-19.
E dentista Yelitza Domacassé-Helmeyer, ta conta con el a experencia durante e temporada aki, cu hopi hende no tin trankilidad mirando e situacion cu nos ta bibando aden. Stress ta hunga un rol grandi y ta bisto den e boca. Jurette Croes, den su trabou diario na DVG a siña masha hopi mes durante di e añanan, produciendo campaña di conscientisacion y informando comunidad riba e topiconan di salud en general. Sinembargo comunica den un crisis ta completamente diferente.
Miranne Geerman recientemente a biba un di e momentonan mas duro di su bida, cu e experencia cu el a pasa aden cu COVID-19, unda el a siña cu e actitud di un ser humano por ta mas cruel cu un virus. Dos mama hoben, Gionina Engelhardt na Aruba y Katyuska Hessing na Hulanda ta conta con nan ta adaptando na nan bida nobo. Clarisse Lopez ta comparti den su entrevista, con el a prepara su mes mentalmente pa e reto pa baha peso y con el a enfrenta y surpasa e obstaculonan pa logra su meta di baha 100 liber.
Den e luna aki cu Clyde Fuenmayor ta celebra 56 aña, e ta bisa cu edad p’e ta simplemente un number. E diseñadora Gigliola Gomez ta splica con e idea pa realisa tapaboca a nace y di su certificacion segun e leynan di protocol di biosiguridad. For di Corsou tin un entrevista cu Germone de Lima y for di Boneiro cu Segni Bernardina, unda ambos ta elabora riba nan carera profesional. Manera tur aña den e luna di october tin e seccion di Home Trends cu Tarita Riley. Den ‘Throwback’ e luna aki tin Ivo Yanez, cu den transcurso di aña Focus a comparti diferente etapa di su bida, unda el a sali riba varios portada di e revista.
El concepto grafico di FOCUS Digital ta dinamico cu un maneho di color ekilibra y cu fotografia magnifico, esaki ta haci e revista mas atractivo pa e lector exigente di awendia. E diseño editorial ta haci e parti di texto incorpora cu e dinamismo multimedia, cu e elementonan nobo di interaccion. FOCUS Digital ta acesibel via Apple Store of Android Google Play Store, cu por download e aplicacion aki riba un smartphone of tablet. E revista ta ‘gratis’ y sigur un experencia unico pa ‘browse’ y lesa e revista preferi di Aruba, cu tin su contenido cu calidad manera semper.
