E concepto di e certamen aki ta pa pone enfasis riba tur tipo di ‘body type’ di e damanan na Aruba. Pa asina demostra cu tur dama ta bunita den nan manera y propio estilo, sin importa nan size. Nan ta brinda e ser femenino entre 18 aña y 70 aña, e oportunidad di por participa den un certamen di beyesa. Y mirando cu esaki ta uno virtual a hacie mas facil pa esunnan cu kisas semper lo tabata desea di por participa, pero cu nunca a tuma e curashi, pero nan lo sinti si mas confortabel cu un plataforma virtual.

Actualmente tin 4 categoria compitiendo pa e titulo maximo:

  • 1. Miss Top of the world Aruba:18 pa 25 aña
  • 2. Miss Top of the World Voluptuous Aruba :18 pa 25 aña
  • 3. Mrs Top of the World Voluptuous Aruba: 26 pa 46 aña
  • 4. Mrs Top of the world Aruba Classic: 47 pa 70 aña

E certamen aki ta hiba den su totalidad 7 reto den 6 siman di tempo. Ya caba e prome reto ta riba nan social media cual ta e videonan di introduccion. E retonan lo ta un variacion di video y tambe fotografia. Tin un total di 9 hurado cu lo ta haciendo e parti di votamento completamente online, y e presidente di hurado ta den persona di Rafael Wever. Na final di cada reto ta anuncia riba tur nan medionan social manera facebook, instagram y tambe nan website, cua ta e top 2 canditata cu a sobresali ‘overall’ cu e miho potret of video.

Locual ta haci e concurso aki uno diferente ta manera a wordo menciona, cu e ta duna e oportunidad pa e damanan cuminsando for di 18 aña te cu un maximo di 70 aña, for di e size mas chikito te cu esunnan cu extra curva pa por participa. E organisadornan local a haya di compronde tambe for di e organisadornan di e certamen internacional, cu e pais ganador normalmente ta ‘host’ e siguiente certamen. Nan ta spera cu si berdad esaki ta asina y Aruba logra titulo maximo, cu nos pais lo por anfitrion di Miss & Mrs Top of the World 2021.

Di cada categoria e ganadora lo representa Aruba na december den e certamen internacional di Miss & Mrs Top Of The World International. E aña aki pa motibo di e pandemia tambe lo ta virtual, y pa otro aña ta spera cu tur cos normalisa pa por bay bek na e certamen fisico. Un di e metanan principal di e certamen aki ta, pa empodera tur nos hende muhernan. Pa nan sa cu beyesa no ta mara na un size specifico ni mucho menos na un edad specifico. Nan lo conoce e diferente damanan cu un storia diferente, sperando cu un di nan storia lo por ta di gran inspiracion pa nan bida. Pa e motibo aki tambe nan tin e diferente retonan, unda por cera conoci cu e candidatanan hopi mas di cerca cu un certamen regular.

LEAVE A REPLY

Please enter your comment!
Please enter your name here