Ateliers ’89 Academia di Bellas Artes Aruba Stichting, ta anuncia su ultimo dos workshop pa aña 2020! Cuminsando dialuna 9 di november te cu e presentacion final den forma di un exposicion riba diahuebs 3 di december. Ta trata aki di dos workshop separa di otro, esta e prome lo ta di ‘Teatro’ y ta dirigi pa e maestra artista Olga Gabrielle van Bokhove, y e dos workshop lo ta ‘Diseño di Muebles’ pa e artista maestro architecto Adriano Nanof Fernades.
Workshop Teatro Performance pa Olga Gabrielle van Bokhove
Olga Gabrielle ta un artista Arubiano multidiciplinario cu ta uza diferente media y e sistemanan di suporte pa logra su lenguahe visual. Su imaginacion ta incorpora elementonan manera paisahe, e impermanencia di e existencia humano, forsanan di naturalesa y e fragilidad di e curpa humano. Den su trabou personal e ta trata di crea momentonan di ‘introspection’ y un reflexion riba nos sociedad compleho y humanidad. Tur creacion ta un biahe di e sentidonan na unda e experencia di e expectador ta central.
Workshop
E preguntanan lo wordo crea y contesta pa e propio relacion di e interprete y percepcion di e mundo den su alrededor, creacion lo sigui di e manera aki cu un metodologia prosaico. E proceso aki lo culmina cu un experencia pa e publico espectador.
Workshop Funccion y Forma, diseño di muebeles pa e architecto Adriano Nanof Fernandes
E miho diseño di mueble ta mustra semper e harmonia cu e mester tin entre forma y funcionalidad, e beyesa di funcionalidad, e midi humano riba escala di un cas. Durante e workshop aki e participantenan lo mira y discuti tocante e diseño di mueble contemporaneo y e estudio haci di e integracion y reconocimento di e piesanan den e ambiente di cas. Nan lo investiga e facilidad- y materialnan pa construe e mueblenan precioso na Aruba, y con pa crea esakinan for di palo, metal, pipanan di plastic y otro materialnan alternativo.
E tarea pa e prome siman: Investigacion di e midi di e curpa humano y su impacto riba e diseño di mueble: E Mesa Imposibel. E di dos siman: Diseño y fabricacion di un piesa di mueble.
Pa por inscribi por manda un e-mail na [email protected]. Por yama tambe na e numbernan di telefon y celular 5885776 o 5654613. E workshopnan aki ta pa un luna. 4 bes pa siman. Di dialuna pa diahuebs y ta di 6.30 pa 9.30pm. Edad ta12 y up. Ateliers ’89 ta situa na Dominicanessenstr. 34 na man drechi riba e crusada.
