El celebre actor britanico, Sean Connery, a muri awe den su soño na e edad di 90 aña. E eterno James Bond a lanta den probresa den e suburbionan di Edimburgo y el a traha entre otro como lechero y camionero prome cu su aficion pa culturismo, cu a yude lansa un carera como actor, cu a converti’e den un di e streanan mas grandi di mundo. Tempo Sean Connery tabata chikito e tabata cortico di estatura, loke a haci cu e hendenan no tabata fiha mucho riba dje, pero tabata durante su adolescencia cu el a yega na 1,88 meter, epoca cu el a cuminsa pensa den actuacion.
Sean Connery a ricibi e premionan mas importante cu un actor por aspira. El a gana un Oscar, dos BAFTA Awards y tres Golden Globe Awards. Connery a participa den decena di pelicula, pero e rol cu a hacie mundialmente famoso tabata sin duda di James Bond, cu el a protagonisa den shete pelicula entre 1962 y 1983. E escritor y experto den cine, Ricardo Silva Romero, a bisa cu tur su personahenan tabata digno, respetabel y sabio. E actor a haci un donacion di 40 miyon dollar na su fundacion, Scottish International Educational Trust, cu ta duna sosten na e muchanan di poco recurso.
