Riba e portada di e edicion di FOCUS Digital pa e luna di november tin un entrepreneur hoben, Emily van Spaandonk, cu su storia sin duda ta inspira mirando cu ni su edad ni e crisis di coronavirus tabata un desafio p’e lansa su marca. E idea pa inicia ‘Atamiki Beauty’ tabata t’ey semper den Emily su mente, pero e no tabatin un nomber ni tampoco a spera cu e lo concretisa asina lihe, pero mas leu den futuro. E ta conta cu e mas dificil como hoben pa crea un marca for di zero tabata pa hende tuma bo na serio. Door cu e ta basta jong ainda, tin biaha hende ta kere cu su marca ta algo cu e ta haciendo ‘just for fun’. Esaki ta algo cu tabata un soño p’e pa hopi tempo caba.
Den e edicion di november por lesa tambe e entrevistanan cu Francis Groeneveldt, cu ta un coach financiero y e ta splica e.o. kico ta e diferencia entre coach riba tereno financiero personal prome y durante COVID-19. E popular personahe di television y comerciante, Jean Carlo Espinal, ta comparti su sentimentonan di e lucha duro den e momentonan mas dificil pa cualkier negoshi riba nos isla. Un pareha cu tin un relacion cu por describi como ideal ta Clifton “TJ” Ahlip y Joelly Croes, cu a conoce otro 9 aña pasa. Nan a ricibi FOCUS na nan maraviyoso proyecto ‘Solimar Villas Aruba’ na Alto Vista, y a conta di e meta cu nan a logra realisa conhuntamente.
E cambio den su apariencia a pone, cu sigur mas cu un hende, lo a wak dos biaha pa ta sigur cu si ta trata di e mesun persona. Tabata riba 20 di maart cu Robin Roland Croes a dicidi cu AWE e mester bira un persona mas saludabel. Lesa con el a logra baha 40 kilo desde maart durante e prome lockdown di COVID-19 te cu e dia di awe. Un logro sigur pa Jennifer Croes-Veeris ta, cu el a ser escogi den ‘Top 100 Beauticians in the World’. Den un solo palabra por describi Jennifer su trabou como un ‘arte’ cu e versatilidad pa multiple talento den un solo persona.
Ichelle & Dennison Oduber ta comparti e ultimo detayenan di nan boda #IDOwedding2020, cu mester a tuma luga december, pero cu a keda posponi door di e pandemia. Nan tur dos ta hopi ansioso y emociona pa e boda religioso y nan ta sigur cu loke lo resalta mas e dia aki ta, e amor cu nan tin pa otro y pa nan yiu. Celebrando Bida tabata un celebracion special cu e enfoke tabata riba un fiesta pa celebra e bida di Ernesto Bermudez, despues di 1 aña cu el a pasa den un situacion hopi critico cu su salud. Esaki sigur ta di admira e fe y curashi di su casa Melanny, cu ta conta y recorda cada momento cu e dokternan tabata bis’e cu e porcentahe di biba di Ernesto tabata solamente 1porciento.
E luna aki tin e seccion di Home Trends 2020 by Tarita Riley cu ta mustra con si bo ta gusta uza diferente estilo den bo cas, e estilo Eclectico Moderno lo ta perfecto pa bo. Tambe ‘Cocooning’, cu ta e tendencia nobo na e momento di diseña bo baño. Den e edicion aki tin e premiere di tres seccion nobo cu e expertonan riba cada tema: Daniela Kuipers-Ramos, Geraldine Alexander y Jessica Wolter. For di Corsou tin un entrevista cu Juni Juliet y for di Boneiro cu Estefani Hagens-Pabon, unda ambos ta elabora riba nan carera profesional. Den ‘Throwback’ e luna aki tin Marisol Lopez-Tromp, cu den transcurso di aña Focus a comparti diferente etapa di su bida, unda el a sali riba varios portada di e revista.
El concepto grafico di FOCUS Digital ta dinamico cu un maneho di color ekilibra y cu fotografia magnifico, esaki ta haci e revista mas atractivo pa e lector exigente di awendia. E diseño editorial ta haci e parti di texto incorpora cu e dinamismo multimedia, cu e elementonan nobo di interaccion. FOCUS Digital ta acesibel via Apple Store of Android Google Play Store, cu por download e aplicacion aki riba un smartphone of tablet. E revista ta ‘gratis’ y sigur un experencia unico pa ‘browse’ y lesa e revista preferi di Aruba, cu tin su contenido cu calidad manera semper.
