E famoso pintor Caribeño for di Aruba, specialista den pinta portret, Gustave Nouel (www.gustavenouel.exto.nl), ademas di su carera internacional di arte, tin hopi experencia pintando portret riba caya na diferente país, hunto cu mas artista. Danki na e experencia internacional aki Gustave Nouel (GN) a crea un curso efectivo y exitoso pa pinta portret, cu e ‘secretonan’ y base universal di e artistanan riba caya. Esaki ta haci pinta portret hopi facil… Tambe pa principiantenan! Actualmente GN ta ofreciendo e curso nobo aki y ‘masterclass’ di pinta portret na ‘Kunstcircuit’ (www.kunstcircuit.nl), e centro di Arte principal di Deventer. Cursonan mester start 19 y 20 di januari 2021, si nan no prolonga e ‘lock-down’ na Hulanda. Tanto e masterclass como e cursonan nobo di sketch portret tabata full caba e prome siman cu nan a ser ofreci. Y ‘wachtlijst’ pa su proximo cursonan na september 2021 ta creciendo… Un curso di arte exitoso na Hulanda, cu of sin Covid!
Tambe na Museo Terramar (www.terramarmuseum.com) di Bonaire, workshops y performance di pintamento di GN a ser planifica, na 2020. Dos biaha nan a ser posponi, pa causa di Covid… Awor, despues di pospone e workshop pa januari 2021, Museo Terramar, tin workshop y mas actividad artístico di GN riba nan programa, di 1 te 9 di mei 2021. Pa dia 9 di mei (Dia di Mama)tin intencion pa presenta e buki ‘Maternidad’, di Zuleika Coffie y Gustave Nouel, na Bonaire oficialmente. Caminda e dos autornan lo firma algun di nan bukinan y hopi mas sorpresa!! Gustave ta sigur cu e cooperacion cu Museo Terramar, lo duna su frutonan. Tambe na Corsow y Sint Maarten, tin interes pa su workshops exitoso y pa presenta e buki ‘Maternidad’ y hasta tin contacto caba pa cooperacion cu e Museo ([email protected]).
Biblioteca Nacional di Aruba, (directora Astrid Britten), a mustra interes pa presenta e buki ‘Maternidad’ den e cuater lenga mas papia na Aruba, cu ‘imagen/pintura’ di pintor Gustave Nouel y ‘poesia’ di actriz, modelo y ‘modelcoach’ Zuleika Coffie! Esaki combina cu un eventual exposicion (digital o real) di pintura cu a ser publica den e buki ‘Maternidad’. E proyecto por conta tambe cu apoyo di Departamento di Cultura (director Siegfried Dumfries). Sin embargo, un fecha concreto pa presentacion na Aruba no a ser fiha ainda. Un soño di Zuleika Coffie y Gustave Nouel ta cu e buki y proyecto ‘Maternidad’ lo stimula mas proyecto artistico y hasta mas intercambio cultural entre e islanan hulandes den Caribe, den futuro, despues di Covid-19.
