Kamala Harris, Vice-Presidente di Merca, a protagonisa e portada di edicion di februari di e revista Vogue. Y a pesar di e relevancia di su aparicion den e publicacion, e berdad ta cu e usarionan di e rednan social a keda decepciona, specialmente pa e tipo di look cu e ta luci den e imagen. E portada controversial aki a pone cu Anna Wintour, editor-in-chief di e revista, mester a sali duna cara y mustra duidelijk cu su intencion hamas tabata pa minimalisa e logronan di Harris. Riba e potret, Kamala ta pose dilanti un fondo berde cu un cortina ros y bisti cu un jacket bruin, carson preto y keds Converse di mesun color; outfit cu den opinion di hopi no ta na nivel ni di e revista of di e importancia di su puesto den e actual panorama politico.
Tocante esey, Wintour a sigura den un comunicado cu el a manda e siman aki pa e corant The New York Times: “Obviamente nos a scucha y compronde e reaccion di e portada imprimi y solamente mi kier reafirma cu no tabata nos intencion en absoluto, di ningun manera, pa disminui e importancia increibel di e victoria di e Vice-Presidente. Nos kier celebra e victoria asombroso di e vicepresidente Harris y e momento importante cu e ta representa pa e historia di Merca, y en particular, pa e muhenan di color di henter mundo”, Wintour a sigura. Segun varios medio, e propio Kamala Harris a sinti decepciona cu su portada, ya cu originalmente a keda acorda cu e lo aparece cu un otro potret. Riba esaki, Wintour a aclarea cu nunca a acorda algun tipo di imagen en especial y cu henter e ekipo di e revista a yega na e conclusion cu e potret den cual Kamala ta aparece cu un look informal ta bay di acuerdo di tempo cu nos ta bibando riba henter e planeta. Den e comunicado Wintour ta bisa cu e dos imagennan a yega Vogue, cu tur a sinti cu e potret menos formal di e Vice-Presidente tabata refleha realmente e momento cu nos ta bibando. Memey di un pandemia espantoso cu e hendenan ta muri pa minuut y cu nan ta refleha e tragico momento den e historia global, cu un imagen menos formal, algo mas accesibel y realmente tabata refleha e ‘hallmark’ di e campaña di Biden-Harris.
