Cu su cumpleaño number 70 awe dia 18 di februari, Isabel Preysler ta sigui cautiva como hende muhe y un icono di estilo. Su fama ta for di tempo cu e tabata casa cu e cantante Julio Iglesias. Mencionando e nomber di Isabel Preysler, loke ta bin na mente di hopi hende ta, un muhe sumamente elegante, no solamente pa su forma di bisti, pero tambe pa su manera refina con e ta anda den e bida social elite. E ta conoci pa ta un mama ehemplar y un compañera sentimental admira y adora pa e hombernan cu a pasa den su bida. Loke semper a ser bisa ta, cu e filipina espectacular aki ken a sali for di su pais cu 17 aña, a yega Spaña pa evoluciona mas leu cu na su pais natal. E tabatin un secreto grandi warda den e mas profundo di su curason pa conkista e sexo opuesto. Niun hende por a descubri e misterio aki, pero loke si ta berdad, cu aunke cuanto critica el a haya hopi biaha, pa no tabata semper leal na esunnan cerca di dje, for di otro hende e no ta stop di haya compliment pa su looks perfecto, cu e ta desfila riba red carpet of cualkier evento den su bida priva.
E añanan a pasa si, pero di un manera diferente compara cu hopi otro hende muhe, awe cu el a supla 70 bela pa celebra su cumpleaño. Su sex appeal ta sigui intacto manera e tempo cu el a conkista Julio Iglesias na final di añanan 60, momento cu e cantante a cuminsa haya fama y exito. Su shete decada di un bida cu si mester skirbi un scipt pa un serie di television igualmente e lo conkista e audienca, con el a seduci su prome casa, e interprete di ‘Me olvidé de vivir’ of ‘Hey’, cu te cu awendia ta sigui ser e cantante spaño cu e proyeccion internacional di mas grandi y cu mas disco bendi y tata di e tres yiunan mayor: Chábeli, Julio José y Enrique.
Despues un aristocratico a drenta su bida, Carlos Falcó, marqués de Griñón, cu a trece trankilidad den su bida y un yiu muhe, Tamara Falcó, cu a hereda e titulo nobiliario di su tata cu a muri recientemente di coronavirus. E siguiente cu a crusa su caminda ta Miguel Boyer, un politico inteligente y e tempo ey tabata minister di Economia y Finansa, y despues di a kibra su di dos union, Isabel a laga tur cos p’e, te cu el a converti den su di tres casa y tata di su cinco yiu, Ana Boyer, cu ta casa di e campeon di tennis Fernando Verdasco.
Awendia cu miles di experencia increibel tras di lomba cu destino tabatin p’e, Isabel Preysler ta feliz den compania di Mario Vargas Llosa, e premio Nobel cu tabata namora di dje den silencio y cu ken e ta comparti biahe, lectura of un conversacion ameno na mesa na nan hogar na Puerta de Hierro na Madrid, unda nan ta biba, y e eventonan caminda nan ta sigui deslumbra cu nan presencia. Isabel Preysler, cu su 70 aña, ta sigui ser un referencia pa loke ta moda y sofisticacion, y e sa con pa ta central den e panorama social manera un celebridad indestructible.
