Awe nochi e cadena CBS ta transmiti e entrevista asina anticipa y explosivo cu a haya atencion mundial, unda cu Oprah Winfrey ta entrevista e Duke y Dukesa di Sussex. Den un extracto di e entrevista intimo cu e nieto di Reina Elizabeth, e prins a declara cu e tabatin temor cu e historia di su mama lo ripiti cu Meghan. “Mi preocupacion mas grandi tabata cu e historia no ripiti”, haciendo referencia na e morto tragico di su mama, cu a fayece den un accidente di auto na Paris na 1997, ora e tabata purbando su escape for di e paparazzinan.
Prins Harry y Meghan Markle a causa un teremoto cu nan decision na inicio di 2020, pa bandona nan responsabilidadnan den e seno di monarkia britanico. E duke di Sussex pa hopi tempo tabatin un relacion dificil cu e prensa sensacionalista britanico y recientemente el a declara cu e presion di e prensa tabata ‘destruyendo’ su salud mental. E prins a bisa cu e ta simplemente alivia y feliz di por ta sinta eynan band’i su casa papiando cu Oprah, mientras e tabatin e man di Meghan teni. “Pasobra mi no por ni sikiera imagina con e tabata p’e (Diana) pa atravesa den e proceso aki su so tur e añanan ey”, el a afirma.
Despues di hopi speculacion awo ta conoci cu e entrevista di Meghan Markle y prins Harry ta filma na e mansion di Gayle King na California. Inicialmente a kere cu e entrevista tan spera lo a tuma luga na nan cas na Montecito di $ 14.5 miyon, pero en realidad el a ser haci na e cas di e miho amiga di Oprah, segun The Mirror. Den e avansenan di e entrevista por a wak e pareha sinta dilanti Oprah den un patio rondona di vegetacion y pilarnan di piedra, pero poco ta loke sa mas di e cas di CBS anchor, Gayle King.
