Un oficial di control di animal, a cumpra un coy hunga di un Unicorn prome cu el a bay hiba Sisu for di e tienda Dollar General pa un shelter. Nan por bisa cu un cacho ta e miho amigo di un hende, pero aparentemente, un unicorn, un peluche color biña, ta e miho amigo di un cacho. E oficialnan a ser yama na e tienda cu ta situa na North Carolina despues cu un cacho di caya a drenta den e luga, y ta bay direct na e gang di coy hunga. “E ta bay directamente pa e unicornio, e mesun cada biaha, Esaki tabata asina straño, y un di e yamadanan mas straño cu mi mester a yega di deal cu ne”, segun un supervisor Duplin County Animal Services.

E trahadonan di e tienda na Kenansville a conta e oficialnan di control di animal, cu nan tabata gara e Lab mix drenta coriendo den e Dollar General, cada biaha cu un cliente ta sali. Cada biaha cu e cacho yega, e ta busca e mesun peluche di unicornio biña. Finalmente nan mester a cera e porta cu yabi y yama e oficialnan, y di e manera aki nan a wordo involucra den e storia di e cacho weguero. Samantha Lane, cu ta e oficial ken a contesta e yamada di Dollar General, a keda asina impresiona cu e afeccion di e cacho pa e unicornio, cu el a cumpra e coy hunga di $10 pa e cacho, cu a sali feliz for di e tienda cu su peluche stima.

Lane a hiba e cacho na Duplin County Animal Services, unda e trahadonan a dune e nomber, Sisu, manera e personahe di e cartoons di e pelicula nobo di Disney, Raya and the Last Dragon. “E unico cos cu nos por pensa ta, cu e ta bin di un cas unda e tabatin un peluche similar of tabatin mucha na e cas”, loke e supervisor di e shelter a comenta. Poco despues di e yegada di Sisu, e shelter a publica un potret di e cacho y su unicorn riba nan Facebook cu e caption: “Esaki ta pasa ora bo ta drenta Dollar General constantemente pa horta un unicorn biña cu bo kier, pero cu despues ‘animal control’ ta wordo yama pa cera bo pa B & E y robo, pero e oficial a compra e articulo y ta trece cu bo”.

Sisu ta wordo considera como un entrada perdi den e shelter, pasobra niun hende a presenta pa reclam’e, pero e cacho obviamente ta stima afecto. E ta pasa tur anochi brasa cu su unicornio den e shelter. Di parti di e shelter nan a bisa cu nan a haya hopi yamada di e personanan interesa pa duna Sisu y su unicornio stima,  un hogar pa semper. Y ta parce cu un pareha ta bay adopta Sisu y su peluche unicornio segun un post diabierna riba Facebook di Duplin County Animal Services, y pronto nan lo muda pa nan cas nobo. E portavoz di Dollar General, Crystal Luce, a bisa e fuente di e informacion aki PEOPLE-PETS cu Dollar General tin plania ‘pa manda bastante unicorn adicional pa e famia adoptivo” un regalo di agradecimento y un donacion di cumida pa e mascotanan na Duplin County Animal Services. “Nos ta contento di mira Sisu ta contento cu su coy hunga nobo”, Luce a finalisa bisando.

PHOTO CREDIT: MARY SHANNON JOHNSTONE

LEAVE A REPLY

Please enter your comment!
Please enter your name here