E noticia del fayecimento di Duke di Edinburgh, a acapara noticia rond mundo despues cu Buckingham Palace a publica un comunicado cu Prins Philip a muri pacificamente awe mainta na Windsor Castle. E duke a pasa su ultimo dianan na Windsor cu su casa, reina Elizabeth, despues di a keda 28 anochi na hospital, unda el a ser interna memey di februari pa un infeccion cardiaco pre-existente.
E prome minister di Reino Uni, Boris Johnson, a lamenta e morto na 99 aña di edad di e duke, cu a inspira y gana afecto di varios generacion di e britaniconan. Prins Philip a muri despues di a converti den e consorte di monarkia britanico cu a biba mas largo, cu mas di setenta aña hunto cu Reina Elizabeth II. E fayecimento di e duke ta pone e nacion y e famia real den luto, y ta spera cu e Mahestad lo bay den un periodo di duelo di ocho dia. E prins tabata e adoracion di e reina desde su adolescencia.
