E tres expertonan: Jessica Wolter, Daniela Kuipers-Ramos y Dina Alexander, tin nan seccionnan hopi interesante den FOCUS Digital Magazine. Jessica ta elabora riba e topico ‘Con pa cuminsa un Practica di Meditacion’. Den e articulonan anterior el a toca e temanan, cu ta brinda informacion riba kico ta nos aura y tambe kico ta nos sistema energetico, cu yama chakra. Afortunadamente nos ta conta cu un disciplina ancestral conoci, manera meditacion, cu ta yuda nos sinti e energia di nos ser. Jessica ta splica: Kico ta meditacion? Kico ta encera un practica di meditacion? Meditacion tin hopi beneficio pa nos salud fisico, mental y emocional.
DanielaKURA coach, trainer & speaker, ta trece for su propio experencia y conocemento, e strategia con pa atrae e pareha ideal, cu ta bin trece mas felicidad ainda den bo bida. Porta bo kier atrae e persona cu bo echt kier comparti bo bida cu ne. Daniela como un coach di manifestacion tin hopi tips pa duna, cu bo por haci pa adkiri esaki. E ta duna tres tips pa atrae bo pareha ideal, uzando e poder di ‘law of attraction’’. Esun prome ta: Sea e pareha ideal pa bo mes prome! E di dos ta: No bay solamente pa apariencia. E di tres ta: Visualisa bo felicidad tur dia! DanielaKURA ta elabora riba cada un di e tres tips aki den su seccion e luna aki.
Dina Alexander ta splica di un retiro unico, cu ta un paso cu nan a dal riba nan mesun isla. Caminda nan ta sali for di e bida rutinario y ta drenta den un luga, unda por a sinti nan mes ‘safe’ cu nan por ‘focus’ riba nan mes. Esaki tabata un biahe, un actualisacion berdadero, pa sambuya den e posibilidadnan di placer. E tipo di retiro aki lo ta uno cu ta bay ta na Aruba tur aña. E retironan ta guia pa e Señora Tiffany Yelverton, fundado y hefe Sexinista Entice Me Soirees, Incorporation and Sexy Survivors. Por lesa e seccionnan aki den edicion di FOCUS Digital di mei, cu ta acesibel via Apple Store of Android Google Play Store, cu por download e aplicacion riba un smartphone of tablet.
