Awe nochi 8or tur hende lo ta ansioso pa mira e 69 competencia di Miss Universe for di Hard Rock Hollywood na Florida. Ta fresco den nos memoria e presentacion impactante di Zozibini Tunzi, Miss South Africa, cu a keda proclama Miss Universo 2019. El a destaca pa su mensahenan fuerte contra racismo y machismo. Cu ya e corona den su poder, Tunzi a reflexiona con e muhenan color scur tabatin dificultad historicamente pa mustra bunita.
Zozibini Tunzi a derota e puertorriqueña Madison Anderson, cu a resulta e prome finalista y e mexicana Sofía Aragón, cu a bira di dos finalista. E aña aki atrobe e dos latinanan aki ta fuerte pa logra drenta den e top 3, mientras cu Miss South Africa, Natasha Joubert, tambe a resalta hopi riba escenario durante e preliminar. E ‘zar de la belleza’, Osmel Sousa, a bisa durante un entrevista recientemente, cu e cantidad di e coronanan internacional cu el a logra pa Venezuela, e logro di mas grandi p’e tabata e ‘back-to-back’, tempo cu Dayana Mendoza (2008) a corona Stefania Fernandez (2009) como Miss Universe. Ta mustra cu e victoria consecutivo di Venezuela den e certamen di Miss Universe ainda ta keda indiscutibel.
Diferente missologo presente na e certamen, cu a mira e candidatanan personalmente a duna nan faboritonan pa e corona di Miss Universe. Un di nan ta Rodner Figueroa di Telemundo, cu a bisa cu awe nochi cualkier cos por pasa. Segun e cu si puntre cua ta e dos candidatanan cu lo keda ‘cara a cara’, e ta contesta: Thailand y Mexico, un di nan dos lo bay t’ey debatiendo pa e corona. El a agrega tambe cu tur cos ta bay basa riba ‘8 minuut’, esaki ta bay marca e diferencia cu ta e parti di entrevista cu hurado y lo bay determina e resultado. Segun su experticio cu e latinanan lo bay domina den e cuadro final cu e paisnan tradicional manera: Colombia, Puerto Rico, Mexico, Republica Dominicana, Venezuela, y tambe Peru y Nicaragua. E enfoke di Rodner Figueroa tabata hopi riba e paisnan latino, sin embargo el a menciona Miss Myanmar, Miss Rumania y Miss Jamaica. Nos ta desea hopi exito na nos Miss Aruba, Helen Hernandez, awe nochi den e certamen di Miss Universe, cu a demostra di ta un digno representante di nos pais.
