E Mexicana, Andrea Meza, cu su estilo y carisma riba e escenario di Hard Rock Hotel & Casino na Florida, a keda corona como Miss Universe 2021. E final a converti den un fiesta Latina, cu e prome finalista Miss Brasil, Julia Gama y Miss Peru, Janick Maceta como e segundo finalista. Andrea Meza (26), cu ta un software engineer, ta hiba e di tres corona di Miss Universe pa Mexico, despues di Lupita Jones, cu a gana na 1991, y Ximena Navarrete, ken a logra e titulo na 2010.
Miss Mexico mester a contesta e pregunta relaciona cu e maneho di pandemia na su pais. “Ami lo a cera e pais hopi prome manera cu el a ser haci y awor ta cuidando miho e ciudadanan, pasobra nos a perde hopi hende y no por perde mas”, e mexicana a contesta. Esaki lo a convence e huradonan y a dune e ventaha riba su compañeranan. Aunke e avalancha di comentario riba e rednan social full rond mundo ta bisa cu Miss Peru ta esun cu merece e corona pa su contestanan.
Andrea ta originario di e estado di Chihuahua y ta midi 1.82 metro di estatura. El a studia na Universidad Autonomo di Chihuahua, unda el a ricibi e titulo como software engineer. E ta un activista pro di e derechonan di e animalnan, situacion cu a pone cu el a bira vegana; ademas e tin su propio marca di outfit deportivo ‘Amaw’. E ta makeup artist y modelo certifica. E tin pasion pa e deportenan extremo y no por keda sin menciona cu el a representa Mexico na Miss World 2017, unda el a keda na di dos luga.
