Algun siman despues cu Andrea Meza a conkista e corona di Miss Universe representando Mexico na Miami, e organisacion a anuncia e representante nobo. Débora Hallal di 24 aña di edad, Miss Sinaloa, a keda escogi pa hiba cu orguyo e sjerp di Miss Mexico den e certamen di Miss Universe 2021.
Lupita Jones, directora di Mexicana Universal, a haci e anuncio den un session live riba Instagram dia 31 di mei. Débora Hallal, cu tabata e prome finalista di Mexicana Universal 2020, a ser nombra e representante di Mexico pa e proximo edicion di e competencia di Miss Universe. Jones a bisa cu e decision aki ta door di e limitacionnan debi na e pandemia y falta di tempo suficiente pa realisa un concurso nacional.
Débora ta e creadora di e proyecto ‘A Purpose’ y el a splica cu e ta bishita e comunidadnan marginal pa brinda tur tipo di asistencia primario. Débora ta Licenciada den Administracion di Empresa, ta modelo y el a keda entre e 10 finalistanan di Miss Teen Mundial na 2016. E hoben ta originalmente di Los Mochis y el a keda band’i Lupita Jones durante su campaña electoral y el a apoya su carera nobo como politico. “Nos ta feliz di anuncia y confirma cu nos bunita Mexicana Universal Sinaloa ta representa nos pais na Miss Universe 2021. ’Felicidades’ Débora Hallal, nos sa cu bo ta bay haci un excelente trabou”, e organisacion a anuncia.
