E ceremonia di apertura di Tokyo 2020 no tabatin publico door di e restriccionnan sanitario adoptada pa preveni e avance di e pandemia di Covid-19. E dia cu Hapon tabata sperando desde dia 13 di september 2013, ora cu Tokyo a ser eligi pa ta cede di e Weganan di 2020. E ceremonia di apertura a cuminsa awe na e capital di Hapon den e Stadion Olimpico, cu e prome biaha den historia a celebra sin publico. Aunke nan a mantene e tradicional desfile di e deportistanan cu ta representa 206 delegacion participante, cu como novedad grandi tabatin dos abanderado pa pais, un homber y un muhe, cu di Aruba tabata den persona di Allyson Ponson y Mikel Schreuders.

Apesar cu e 68.000 asientonan di e Stadion Olimpico tabata bashi, e ceremonia si a conta cu presencia, reduci di algun personalidad manera e emperador Hapones Naruhito y First Lady di Merca, Jill Biden. E presidente frances, Emmanuel Macron, tabata e unico lider di G7 presente na Tokyo, como maximo representante tambe den e proximo cede olimpico, Paris 2024. E ceremonia a duna inicio cu un homenahe na e atletanan bou di e lema ‘United by Emotion’. Varios deportista Hapones a mustra e esfuerso ey, cu un coreografia cu a representa e dificultadnan pa train y sigui luchando pa nan soñonan memey di un pandemia.

Un baile haci cu hilo cora, cu ta simbolisa e tehidonan di e musculonan di e atletanan, a emociona miyones  cu a sigui e transmision rond mundo. Despues a ser presenta emperador Naruhito y e presidente di Comite Olimpico Internacional, Thomas Bach. Ambos a duna luga pa e bandera di Hapon, cu ser carga pa varios  gloria di e deporte olimpico. E bandera a ser hisa mientras e famoso cantante Hapones Misia a entona e himno nacional. E ceremonia a continia cu un homenahe na e fayecidonan di e pandemia di Covid-19.  

Diripiente,1800 drone a bula hunto pa forma un balon den e shelo, dibuhando e siluetanan di e wereldbol.  Y despues mientras e dronenan tabata bula riba e stadion, a cuminsa zona ‘Imagine’ di John Lennon. E presentacion musical a conta cu e participacion di Alejandro Sanz, John Legend, Keith Urban y Angelique Kidjo, cu a representa diferente continente, a interpreta e clasico di John Lennon ‘Imagine’.

Despues a yega e momento oficial di e ceremonia, cu e discurso di e presidente di Comite Olimpico Internacional, Thomas Bach, cu a duna bonbini na e ekipo olimpico di refugiado. Finalmente, a yega un di e momentonan mas spera di e ceremonia: emperador Naruhito a declara inaugura e weganan Olimpico Tokyo 2020; inmediatamente despues, e bandera olimpico a wordo hisa hunto cu e bandera di Hapon. E antorcha di e Weganan Olimpico a ser cendi despues cu e Weganan a ser declara habri y a hisa e bandera.

LEAVE A REPLY

Please enter your comment!
Please enter your name here