Un amiga a curasha Eunice pa participa den e certamen di Miss Aruba Online pa e purba algo diferente. E tabata pasando den un temporada basta dificil pa loke ta su salud mental. El a inscribi cu e pensamento y meta, pa uza e plataforma di MAO pa conscientisa e otro hendenan, cu ta refleha e problema aki. E parti adaptacion durante e certamen tabata loke mas el a gusta, cu e por a kibra e miedo di papia, y haya e curashi pa expresa su mes libremente tocante salud mental a traves di un video cortico y live stream.
Mirando bek na e experencia den Miss Aruba Online, e ta sinti cu el a sali miho como persona. Miho den e forma cu e por sinta y purba compronde no solamente su sentimentonan, pero tambe di otro hende. Despues cu el a presenta e reto ‘Bo Causa’, el a haya un shock ora el a haya sa cu tin mas persona cu ta similar cu ne. Nunca Eunice a biba pensa cu tin un gran parti di hende pasando den e momentonan dificil, y cu nan tambe tin miedo di papia. Miss Aruba Online 2021 den Focus Digital Magazine ta conta entre otro con semper el a sinti como un ‘outcast’ door cu su salud mental no tabata den balans.
FOCUS Digital Magazine di juli, ta accesibel ‘gratis’ via Apple Store of Android Google Play Store, cu por download e aplicacion riba un smartphone of tablet.
